„საქართველოს ალიანსი უსაფრთხო გზებისთვის“ ინფორმაციით, გარემოს დაცვის მსოფლიო დღე ყოველ წელს, 5 ივნისს აღინიშნება მსოფლიო მასშტაბით და მიმდინარე წელს ამ დღის მთავარი გზავნილია #GenerationRestoration #თაობააღდგენისთვის.
მათივე ცნობით, 5 ივნისს, 14:00 საათზე, მზიურის პარკში, (კაფეში „მზიური“) ორგანიზაცია „საქართველოს ალიანსი უსაფრთხო გზებისთვის“ საქართველოში გაეროს მუდმივ წარმომადგენლობასთან ერთად გარემოს დაცვის საერთაშორისო დღისადმი მიძღვნილ ღონისძიებას გამართავს.
„შეხვედრის მთავარი თემაა ჰაერის ხარისხი და ავტოტრანსპორტის ტექნიკური ინსპექტირების რეფორმის მიმდინარეობა საქართველოში.
ღონისძიებაზე წარმოდგენილი იქნება ჰაერის დაბინძურების თემატიკაზე გადაღებული სოციალური ფოტონამუშევრების გამოფენა, რომელიც აჩვენებს დაბინძურებული ჰაერის ზეგავლენას ადამიანის ჯანმრთელობაზე და საცხოვრებელ გარემოზე.
შეხვედრაში მონაწილეობას მიიღებენ და სიტყვით გამოვლენ გაეროს მუდმივი წარმომადგენელი საქართველოში საბინე მახლი, საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარის მოადგილე ხატია წილოსანი, გარემოს დაცვისა და სოფლის მეურნეობის მინისტრის მოადგილე ნინო თანდილაშვილი“, - ნათქვამია ინფორმაციაში.