სოზარ სუბარი - რეგიონული პოლიტიკის კომიტეტი მიზანშეწონილად მიიჩნევს მაღალმთიანი სტატუსის მქონე მუნიციპალიტეტებს მიეცეთ შეღავათი სატენდერო პროცედურების გამარტივებაზე

რეგიონული პოლიტიკისა და თვითმმართველობის კომიტეტის სხდომაზე სკოლამდელი აღზრდისა და სასკოლო ინფრასტრუქტურის ობიექტების მშენებლობის მიმდინარეობის, სამომავლო გეგმებისა და გამოწვევების შესახებ ანგარიში მოისმინეს.

პარლამენტის ინფორმაციით, კომიტეტს ინფორმაცია საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ ილია ბეგიაშვილმა წარუდგინა.

„2019 წლიდან დღემდე ამ მიმართულებით განხორციელებულია 2204 პროექტი. პროექტების ჯამური ღირებულება 621 მლნ ლარს შეადგენს. აჭარისა და თბილისის გარდა, 57 მუნიციპალიტეტში 1915 სკოლა და 1283 ბაღია. 2019 წლიდან დღემდე აშენდა 65 ახალი სკოლა და რეაბილიტირდა 103 სკოლა", - აღნიშნა მომხსენებელმა.

საქართველოს განათლებისა და მეცნიერების მინისტრის პირველმა მოადგილემ ეკატერინე დგებუაძემ ბაღებთან მიმართებაში განათლების სამინისტროს ვალდებულებებზე ისაუბრა.

„აუცილებელია ვიფიქროთ ინფრასტრუქტურაზე და იმ პირობებზე, რომელიც მნიშვნელოვანია ხარისხიანი განათლებისთვის. მოგეხსენებათ ინფრასტრუქტურული გარემო ერთ-ერთი მნიშვნელოვანი კომპონენტია, როდესაც ხარისხიან განათლებაზე ვსაუბრობთ. მნიშვნელოვანია შევიმუშაოთ საგანმანათლებლო სტანდარტები და მოვახდინოთ სტანდარტების განხორციელების მონიტორინგი", - განაცხადა ეკატერინე დგებუაძემ.

კომიტეტმა ინფორმაცია ცნობად მიიღო და გასცა რეკომენდაციები.

„კომიტეტი მიზანშეწონილად მიიჩნევს მაღალმთიანი სტატუსის მქონე მუნიციპალიტეტებს მიეცეთ შეღავათი სატენდერო პროცედურების გამარტივებაზე", - აღნიშნა კომიტეტის თავმჯდომარემ სოზარ სუბარმა.

თენგიზ ფხალაძე - რუსეთის ყველა უკანონო ნაბიჯი მოითხოვს რეაგირებას, მოსკოვმა უნდა გადაიხადოს პოლიტიკური ფასი საქართველოს წინააღმდეგ ჩადენილი ყველა დანაშაულისათვის, დუმილით კი ამას ვერ მივაღწევთ
ქართული პრესის მიმოხილვა 08.08.2022
კახა ოქრიაშვილი აგვისტოს ომის მე-14 წლისთავთან დაკავშირებით განცხადებას ავრცელებს