7 ივნისს, სან დიეგოს სახელმწიფო უნივერსიტეტი საქართველოს მრჩეველთა საბჭოს მორიგ შეხვედრას გამართავს.

მრჩეველთა საბჭო ემსახურება უნივერსიტეტსა და კერძო და საჯარო სექტორს შორის კავშირების გამყარებას და ერთობლივი პროექტების ხელშეწყობას. საბჭოს წევრები არიან სან დიეგოს სახელმწიფო უნივერსიტეტის დეკანები, კერძო და საჯარო ორგანიზაციების ხელმძღვანელები, პარტნიორი უნივერსიტეტების რექტორები, აკადემიური სფეროს წარმომადგენლები და უნივერსიტეტის დონორი ორგანიზაციები. შეხვედრას დაესწრება სან დიეგოს სახელმწიფო უნივერსიტეტის პრეზიდენტი, ადელა დე ლა ტორე და საქართველოში აშშ-ს ელჩის მოადგილე, ქეთრინ შვაიცერი.

შეხვედრის მონაწილეები განიხილავენ სან დიეგოს სახელმწიფო უნივერსიტეტი საქართველოს მიმდინარე მიღწევებს, კურსდამთავრებულთა წარმატებული დასაქმების საკითხებს და კერძო სექტორთან თანამშრომლობის შესაძლებლობებს, სდსუ საქართველოს პროექტის მდგრადობის უზრუნველსაყოფად. შეხვედრაზე ასევე წარმოდგენილი იქნება უნივერსიტეტის კარიერისა და დასაქმების მიმართულება, რომელიც სან დიეგოს სახელმწიფო უნივერსიტეტის სტუდენტებისა და კურსდამთავრებულების დასაქმებას და ბაზარზე არსებული დანაკლისის შევსებას ემსახურება ტექნოლოგიური და საინჟინრო მიმართულებით. სან დიეგოს უნივერსიტეტი საქართველო ყოველსემესტრულ დასაქმების გამოფენას მართავს, რომელზეც წარმოდგენილი არიან უნივერსიტეტის მრჩეველთა საბჭოს წევრი ორგანიზაციები.

სან დიეგოს სახელმწიფო უნივერსიტეტი (SDSU) ათასწლეულის გამოწვევის ფონდი - საქართველოს უმაღლესი განათლების კომპონენტის ფარგლებში, საქართველოში ახორციელებს მაღალი ხარისხის, საერთაშორისო აკრედიტაციის მქონე საბაკალავრო პროგრამებს საინჟინრო და ტექნოლოგიურ (STEM) დარგებში. აღნიშნული პროგრამები ხელს შეუწყობს ქვეყანაში საბუნებისმეტყველო და ტექნოლოგიური დარგების განვითარებასა და მაღალკვალიფიციური კადრების მომზადებას. პროექტი ხორციელდება აშშ-ის ათასწლეულის გამოწვევის კორპორაციის (MCC) მეორე კომპაქტის ფინანსური მხარდაჭერით.