შეხვედრის დიდი დრო დაეთმო, ზოგადად, დემოკრატიის წინაშე არსებულ გამოწვევებზე საუბარს, - ამის შესახებ „სოციალური სამართლიანობის ცენტრის“ წარმომადგენელმა, გურამ იმნაძემ აშშ-ის სახელმწიფო მდივნის მოადგილის მოვალეობის შემსრულებელ ფილიპ რიკერთან შეხვედრის შემდეგ განაცხადა.
მისივე თქმით, დიდი ხანია ქვეყანა პოლიტიკურ კრიზისშია და ძალიან მნიშვნელოვანია, ამ კრიზისის დაძლევისთვის ბაზისური, დემოკრატიული ინსტიტუტების მშენებლობა.
„შეხვედრის დიდი დრო დაეთმო, ზოგადად, დემოკრატიის წინაშე არსებულ გამოწვევებზე საუბარს. იმაზე, რომ უკვე დიდი ხანია ქვეყანა პოლიტიკურ კრიზისშია და ძალიან მნიშვნელოვანია, ამ კრიზისის დაძლევისთვის ბაზისური, დემოკრატიული ინსტიტუტების მშენებლობა. ცხადია, ამავდროულად ვისაუბრეთ სასამართლო სისტემაში ჩასატარებელ რეფორმებზე და „კლანურობასთან" დაკავშირებულ პრობლემებზე, რომელიც ჭარბად არსებობს დღეს სისტემაში.
ვისაუბრეთ იმაზე, თუ რამდენად მნიშვნელოვანი იყო 19 აპრილის დოკუმენტი, მაგრამ ხაზი გავუსვით იმასაც, რომ ამ შეთანხმების ხელმოწერით კრიზისი არ განმუხტულა, უბრალოდ, ახლა იწყება ამ კრიზისის განმუხტვაზე მუშაობა“, - განაცხადა გურამ იმნაძემ.