გასულ კვირას დარეგისტრირდა კიდევ ერთი ფრაქცია „შარლ მიშელის რეფორმების ჯგუფი“ და ფრაქციის მთავარი მიზანი იქნება, რომ შესრულდეს შეთანხმება ისე, როგორც ამას ითვალისწინებს სულისკვეთება და თითოეული პუნქტი, - ამის შესახებ, ახალშექმნილი ფრაქციის წევრმა თეონა აქუბარდიამ პარლამენტის პლენარულ სხდომაზე განაცხადა.
მისი თქმით, ყველა დელეგაცია, რომელთა ვიზიტიც გასულ კვირას განხორციელდა საქართველოში, ერთხმად აღნიშნავდა იმ გარემოებას, თუ რა მნიშვნელობა აქვს შარლ მიშელის შეთანხმებას ქვეყნის მომავლისთვის, იმ მომავლისთვის, რომელიც აირჩია ამ ქვეყნის თითოეულმა მოქალაქემ და რაც არის ევროპულ და ევროატლანტიკურ ოჯახში გაწევრიანება.
„ჩვენ როდესაც გადაწყვეტილება მივიღეთ, რომ გავერთიანებულიყავით ამ ფრაქციაში - „რესპუბლიკური პარტია“, „სტრატეგია აღმაშენებელი“, „გირჩი“ და დამოუკიდებელი დეპუტატები, მთავარი ამოცანა იყო ის, რომ ამ შეთანხმების შესრულება მომსახურებოდა თითოეული მოქალაქის კეთილდღეობას, სტაბილურობას და უსაფრთხოებას და იმ საგარეო პოლიტიკურ ინტერესს, რომლითაც ჩვენ, მათ შორის, ამ განცხადებითაც გავერთიანდით. საკითხები, რომლებზეც ჩვენი პარტნიორი ქვეყნების წარმომადგენლებმა ამ კვირას გააკეთეს აქცენტები არის საარჩევნო რეფორმა, სასამართლო რეფორმა, რომელიც არის ქვაკუთხედი ქვეყნის დემოკრატიისთვის და გვაქვს ამ კუთხით მნიშვნელოვანი გამოწვევები, აუცილებელია სამუშაო ჯგუფის გააქტიურება იმისთვის, რომ სასამართლო რეფორმა როგორც ამას შარლ მიშელის შეთანხმების დოკუმენტი ითვალისწინებს, განხორციელდეს და ამ კუთხით საქართველოს დაუფიქსირდეს პროგრესი“, - განაცხადა აქუბარდიამ.