არ ვაპირებ ეს ტრიბუნა გამოვიყენო იმისთვის, რომ პასუხი გავცე ყველა ბრალდებას და ტალახს, რაც თქვენმა პარტიამ მე და ალეკო ელისაშვილს გვესროლეთ. ამის საშუალება გვექნება და აუცილებლად გაგცემთ პასუხს, - ასე მიმართა პარტია „მოქალაქეების" დეპუტატმა, პარლამენტის ვიცე-სპიკერმა ლევან იოსელიანმა პარლამენტის საზაფხულო სესიის პლენარულ სხდომაზე ფრაქცია „ერთიანი ნაციონალური მოძრაობა“ - გაერთიანებული ოპოზიცია „ძალა ერთობაშიას“ წევრებს.
ლევან იოსელიანის განცხადებით, „ნაციონალური მოძრაობის“ პარლამენტში შემოსვლით დღეს არის დღე, როდესაც „სამართალმა პური ჭამა“.
„პირველ რიგში, მოგილოცავთ პარლამენტში შემობრძანებას. არ ვაპირებ ეს ტრიბუნა გამოვიყენო იმისთვის, რომ პასუხი გავცე ყველა ბრალდებას და ტალახს, რაც თქვენმა პარტიამ მე და ალეკო ელისაშვილს გვესროლეთ. ამის საშუალება აუცილებლად გვექნება და აუცილებლად გაგცემთ პასუხს. სამართალი ნამდვილად ურმით დადის და დღეს ის დღეა, როდესაც სამართალმა პური ჭამა. თქვენ სხედხართ აქ, მე ვდგავარ ტრიბუნაზე და გესაუბრებით, ბევრი რამის თქმა შემიძლია, უბრალოდ მირჩევნია ვილაპარაკო იმ საკითხებზე, რაც ჩვენს მოქალაქეებს ანაღვლებთ“, - აღნიშნა ლევან იოსელიანმა.