მიხეილ ჩხენკელი - ეს არის ჭეშმარიტად ევროპული, მსოფლიო სტანდარტების მქონე უნივერსიტეტი, რომელიც ეტაპობრივად ახალ აკადემიურ პროგრამას დაიმატებს

ქუთაისის საერთაშორისო უნივერსიტეტმა საქართველოს პრემიერ-მინისტრს ირაკლი ღარიბაშვილს უმასპინძლა. განათლების სამინისტროს ინფორმაციით, მთავრობის მეთაურმა განათლებისა და მეცნიერების მინისტრთან მიხეილ ჩხენკელთან ერთად უნივერსიტეტის ინფრასტრუქტურა დაათვალიერა, რომელიც ულტრათანამედროვე აკადემიურ კორპუსებს, ბიბლიოთეკებს, კაფეტერიებს, კეთილმოწყობილ სასპორტო და საგზაო ინფრასტრუქტურას, საერთო სამუშაო სივრცეებს, სტუდენტურ საცხოვრებლებს, ასევე საცხოვრებლებს აკადემიური და ადმინისტრაციული პერსონალისთვის მოიცავს.

პრემიერ-მინისტრი ის ადგილასაც იმყოფებოდა, სადაც ადრონული თერაპიის ცენტრი უნდა აშენდეს. ქუთაისის საერთაშორისო უნივერსიტეტში სტუდენტებთან შეხვედრა გაიმართა. საპატიო სტუმრებმა საზოგადოებას სიტყვით მიმართეს, ახალგაზრდებს სემესტრის სასწავლო პერიოდის დასრულება მიულოცეს და წარმატებული მომავალი უსურვეს.

„განათლების გარეშე ჩვენი ქვეყნის განვითარება წარმოუდგენელია, ვინაიდან განათლება არის ის მყარი ფუნდამენტი, საფუძველი იმისა, რომ ერთად ავაშენოთ ძლიერი საქართველო. ჩემი თავმდაბალი რჩევა იქნება, ჯერ მკაფიოდ ჩამოყალიბდეთ მიზანზე – თქვენი მიზანი უნდა იყოს ძალიან მკაფიოდ ჩამოყალიბებული. გირჩევთ, რომ ეს თამასა აწიოთ უმაღლეს დონეზე. არ უნდა დაიწყოთ პატარა მიზნით, დაიწყეთ ყველაზე დიდი მიზნით. მეორე, რაც მინდა გირჩიოთ, არის თავდადება – ამ მიზნისკენ მუხლჩაუხრელი, 24-საათიანი შრომა. ყოველი ჩვენი მიღწეული წარმატება, იქნება ეს პირველი თუ მეორე კურსის დამთავრება, ჩვენს წარმოსახვაში უნდა გვაახლოებდეს ამ მიზანს. ჩვენ თუ ამ სულისკვეთებით ვივლით, ყველა მივაღწევთ დიდ ოცნებას და მიზანს, იმიტომ რომ მიუღწეველი არაფერია“, - განაცხადა ღარიბაშვილმა.

„არც ისე დიდი ხანია, რაც გავხსენით ქუთაისის საერთაშორისო უნივერსიტეტი. გახსოვთ, როგორი ემოციური მომენტი იყო, როდესაც თქვენ სტუდენტური ფიცი დადეთ და დაიწყო აკადემიური პროცესი. მართალია, ის კორონავირუსის პანდემიის გამო უჩვეულო გარემოში მიმდინარეობდა, მაგრამ მთავარია, რომ ერთობლივი ძალისხმევით – თითოეულმა პროფესორ-მასწავლებელმა, თითოეულმა სტუდენტმა, უნივერსიტეტის ხელმძღვანელობამ, მთელმა განათლების სისტემამ, დავძლიეთ ეს რთული გამოწვევა. იმედი გვაქვს, რომ სექტემბრიდან აკადემიურ სივრცეში, ჩვეულ გარემოში გაგრძელდება სწავლა ამ დიდებულ უნივერსიტეტში. როგორც მოგეხსენებათ, ქუთაისის საერთაშორისო უნივერსიტეტის იდეისა და კონცეფციის ავტორია ბიძინა ივანიშვილი. სწორედ მისი და მისი ოჯახის უაღრესად მნიშვნელოვანი ქველმოქმედების შედეგია ეს ჭეშმარიტად ევროპული, მსოფლიო სტანდარტების მქონე უნივერსიტეტი, რომელიც ეტაპობრივად ახალ აკადემიურ პროგრამას დაიმატებს. ასევე, მინდა გითხარათ და თქვენ მოესწრებით ამას, მიმდინარეობს ადრონული თერაპიის ცენტრის მშენებლობა, რომელიც უნივერსიტეტის ნაწილი იქნება. ესეც მსოფლიო მნიშვნელობის პროექტია და მთლიანად ფინანსდება „ქართუ“ ფონდის მიერ. აქ განთავსდება ორი ციკლოტრონი, ერთი მოხმარდება ულტრათანამედროვე მეთოდებით სიმსივნის მკურნალობას, რაც განსაკუთრებით მნიშვნელოვანია სიმსივნით დაავადებული ბავშვებისთვის, ხოლო მეორე ციკლოტრონი – მთლიანად სამეცნიერო კვლევით პროცესს მედიცინაში, სამედიცინო ფიზიკასა და ბირთვულ ფიზიკაში. მე პირადად მქონდა ბედნიერება, შევხვედროდი მსოფლიოს წამყვან მეცნიერებს ამ დარგებში. მათ უკვე დიდი ენთუზიაზმით გამოთქვეს მზაობა, ჩამოვიდნენ ქუთაისში და ქართველ მეცნიერებთან ერთად აწარმოონ სამეცნიერო-კვლევითი პროცესი. ასე რომ, ქუთაისის საერთაშორისო უნივერსიტეტში ძალიან საინტერესო პროცესები მიმდინარეობს, თქვენ უდავოდ ხართ ამ ისტორიის ნაწილი. ევროპა საქართველოში შემოვიდა აქ, ქუთაისში, ამ უნივერსიტეტის სახით, და კიდევ ერთხელ გავიმეორებ, ეს ჭეშმარიტად არის უმაღლესი ევროპული სტანდარტის მქონე უნივერსიტეტი. თქვენ უკვე თითქმის დაასრულეთ ეს სემესტრი, გამოცდები დაგრჩათ, მთელი გულით გისურვებთ წარმატებებს, და, რასაკვირველია, მთელი სტუდენტობის განმავლობაში თქვენს გვერდით ვართ! თქვენს წარმატებაში დარწმუნებული ვარ, იმიტომ რომ ასეთი კარგები და ნიჭიერები ხართ. დიდი მადლობა ყველას!“, - განაცხადა ჩხენკელმა.

სტუდენტებთან შეხვედრის საზეიმო ღონისძიებას რექტორი ალექსანდრე თევზაძე, კანცლერი მაგდა მაღრაძე, ფონდ „ქართუს“ გამგეობის თავმჯდომარე ნიკო ჩხეტიანი და პროექტების დირექტორი ვახტანგ ცაგარელი, ასევე, ადგილობრივი ხელისუფლების წარმომადგენლები და სხვა მოწვეული სტუმრები ესწრებოდნენ.

ცნობისთვის, ქუთაისის საერთაშორისო უნივერსიტეტი 2020 წლის ოქტომბერში საზეიმოდ გაიხსნა. სტუდენტთა პირველი ნაკადი უნივერსიტეტმა ბაკალავრიატის სამ ინგლისურენოვან პროგრამაზე (მენეჯმენტი, მათემატიკა და კომპიუტერული მეცნიერება) მიიღო. STEM-ის მიმართულების პროგრამების მიხედვით ქუთაისის საერთაშორისო უნივერსიტეტი სამ ყველაზე მაღალი ბარიერის მქონე უნივერსიტეტებს შორის სახელდება საქართველოში. დაწესებული მაღალი ბარიერის გადალახვა 2020 წელს 245-მა ახალგაზრდამ შეძლო. ქუთაისის საერთაშორისო უნივერსიტეტის საპატიო პრეზიდენტი მსოფლიოში ცნობილი მეცნიერი, მიუნხენის ტექნიკური უნივერსიტეტის ყოფილი პრეზიდენტი პროფესორი ვოლფგანგ ჰერმანია, ხოლო მრჩეველთა საბჭოს წევრები მსოფლიოს სხვადასხვა ქვეყნის ცნობილი და წამყვანი მეცნიერები არიან. უნივერსიტეტში არსებული მრჩეველთა ინდუსტრიული საბჭოს შემადგენლობაში კი მსოფლიოს წამყვანი კომპანიების წარმომადგენლები და ბიზნეს ასოციაციები არიან. ქუთაისის საერთაშორისო უნივერსიტეტში ლექციებს ქართველ პროფესორებთან ერთად კითხულობენ მეცნიერები მსოფლიოს წამყვანი უნივერსიტეტებიდან. დაფუძნების დღიდან უნივერსიტეტი თანამშრომლობს მსოფლიოში ერთ-ერთ წამყვან, მიუნხენის ტექნიკურ უნივერსიტეტთან, რომლის შედეგადაც ერთობლივი აკადემიური პროგრამები შეიქმნა.

რაულ ჩილაჩავა - აშშ რუსეთის პრეტენზიებზე მომავალ კვირაში გასცემს წერილობით პასუხს, ეს უკვე საინტერესოა, დაველოდოთ
პაატა დავითაია - ნეიტრალური პოზიციით ხელისუფლებამ  შესაძლოა,  ისეთი დარტყმები მიიღოს, რაც მას  სრულად ჩამოშლის
ქართული პრესის მიმოხილვა 20.01.2022
გიორგი კანაშვილი - უკვე გაჩნდა დაკვეთა სხვა პოლიტიკური კულტურის მქონე პოლიტიკოსებზე და დროა, პოლიტიკოსებმა ალღო აუღონ ახალ რეალობას
რუსეთის პოლიტიკური-სამხედრო დემარში:   მეტად კონკრეტულად ცალკეული ასპექტების შესახებ
"ავერსსა" და ეროვნულ ოლიმპიურ კომიტეტს შორის თანამშრომლობის მემორანდუმი განახლდა
„ლისი დეველოპმენტმა" International Property Awards-ზე უძრავ ქონებაში ორი ხუთვარსკვლავიანი ჯილდო მიიღო
PSP 2021 წლის „ლიდერ“ ბრენდად დასახელდა
მცირე და საშუალო ბიზნესების გაძლიერების პროგრამა BGROW დაიწყო
"სილქფესტი" მომხმარებლებს ორი დღით სასაუბრო და ინტერნეტ პაკეტებს შესთავაზებს!