კავკასიის ბუნების ფონდსა და დაცული ტერიტორიების სააგენტოს შორის საგრანტო ხელშეკრულებები გაფორმდა

დაცული ტერიტორიების სააგენტოსა და კავკასიის ბუნების ფონდს შორის საგრანტო ხელშეკრულებები გაფორმდა. დაცული ტერიტორიების სააგენტოს ინფორმაციით, ხელშეკრულებებს ხელი გარემოს დაცვისა და სოფლის მეურნეობის მინისტრის მოადგილემ, იური ნოზაძემ, კავკასიის ბუნების ფონდის (CNF) აღმასრულებელმა დირექტორმა, თობიას მიუნხმაიერმა და დაცული ტერიტორიების სააგენტოს თავმჯდომარის მოადგილემ, თამარ ხახიშვილმა მოაწერეს. როგორც გარემოს დაცვისა და სოფლის მეურნეობის მინისტრის მოადგილემ, იური ნოზაძემ განაცხადა, დაცული ტერიტორიების სააგენტო მრავალი წელია მჭიდროდ თანამშრომლობს კავკასიის ბუნების ფონდთან.

„სწორედ ამ თანამშრომლობის ფარგლებში მოეწერა ხელი 2 ხელშეკრულებას, რომელიც ითვალისწინებს ყველა ადმინისტრაციის თანამშრომლის სიცოცხლისა და ჯანმრთელობის დაზღვევას, ასევე მათი სამუშაო პირობების გაუმჯობესებას. ვფიქრობ, ეს მხარდაჭერა კიდევ უფრო გაუზრდის მოტივაციას ჩვენს თანამშრომლებს და, ამავე დროს, ხელს შეუწყობს მათ კეთილდღეობას“, - განაცხადა იური ნოზაძემ.

თანამშრომელთა მოტივაციის ამაღლებისა და სამუშაო პირობების გაუმჯობესების მიზნით, საგრანტო ხელშეკრულების ფარგლებში, შემდეგი ერთი წლის განმავლობაში, სახელფასო დანამატს მიიღებს დაცული ტერიტორიების სისტემაში შემავალი ტერიტორიული ადმინისტრაციის ყველა თანამშრომელი. „მოხარული ვარ, რომ ხელი მოვაწერეთ ამ ორ უმნიშვნელოვანეს ხელშეკრულებას. გრანტი, რომელსაც ჩვენ გავცემთ დაცული ტერიტორიების სააგენტოსთვის, ემსახურება რეინჯერების მოტივაციის ამაღლებას და მათ მხარდაჭერას, უნიკალური ბუნების დასაცავად გაწეული ყოველდღიური უდიდესი საქმიანობისთვის. ჩვენ ყოველთვის უნდა გვახსოვდეს, რომ რეინჯერები არიან მამოძრავებელი ძალა იმ უდიდესი სისტემის, რასაც ბუნების დაცვა ეწოდება. სწორედ ამიტომ, ყოველთვის აუცილებელია მათი მოტივაცია და მხარდაჭერა“, - აღნიშნა კავკასიის ბუნების ფონდის აღმასრულებელმა დირექტორმა, თობიას მიუნხმაიერმა.

მათივე ცნობით, კავკასიის ბუნების ფონდი (CNF) წლების მანძილზე თანამშრომლობს დაცული ტერიტორიების სააგენტოსთან და დიდი წვლილი შეაქვს როგორც დაცული ტერიტორიების ინფრასტრუქტურის განვითარებაში, ასევე თანამშრომლების მოტივაციის ამაღლებასა და მათ წახალისებაში.

ალექსანდრე თვალჭრელიძე - ფრიდმანის წინააღმდეგ სანქციების დაწესებამ იდეალური შესაძლებლობა შექმნა კომპანიის გაკოტრების და იქ სახელმწიფო მმართველის იმპერატიული დანიშვნისთვის, ამას კი „ბორჯომის“ ნაციონალიზაცია უნდა მოჰყვეს
ქართული პრესის მიმოხილვა 23.05.2022
ჰუბერტ ქნირში - გზა ევროკავშირში გაწევრიანებისკენ ჯერ კიდევ გრძელია - ის, რაც რამდენიმე კვირაში ევროპის საბჭომ შეიძლება გადაწყვიტოს, არის გზის დასაწყისი, არის გადაწყვეტილება, რომ ჩვენ ერთად გვინდა ამ გზის გავლა
„მაკდონალდს საქართველო“ Mc Happy Day-ის საქველმოქმედო კამპანიას იწყებს