პარტია „საქართველოსთვის" პროგრამის ფუნდამენტური ღირებულება არის სამართლიანი სახელმწიფო, რაც, პირველ რიგში, გამოიხატება იმაში, რომ საქართველოს მოქალაქეებს უნდა ჰქონდეთ თანაბარი წვდომა სახელმწიფო რესურსებსა და შესაძლებლობებზე, - ამის შესახებ პარტია „საქართველოსთვის" პოლიტსაბჭოს წევრმა გიორგი შარაშიძემ განაცხადა. მისი თქმით, პირველ რიგში, ეს გამოიხატება სამეწარმეო ბიზნეს საქმიანობის ინვესტირებით.

„საქართველოს რეგიონებში ლოკალური პოტენციალის გათვალისწინებით და ამ მიმართულებით, პარტიის პროგრამაში ბევრი მნიშვნელოვანი ინიციატივა და ინსტრუმენტი არის გათვალისწინებული, პირველ რიგში, ეს არის მიზიდულობის ცენტრები რეგიონებში, რაც ნიშნავს დამატებითი სამუშაო ადგილების შექმნას და დამატებითი ლოკალური შესაძლებლობების გაჩენას, რაც შეიძლება მეტი ქართული ოჯახისთვის და მეწარმისთვის და რაც მთავარია, საგადასახადო და, ზოგადად, პრობიზნესური გარემოს შექმნა საქართველოს უკლებლივ ყველა რეგიონში“,- განაცახდა შარაშიძემ. გიორგი შარაშიძემ ხაზი გაუსვა რეგიონული პოლიტიკის საკითხებს და აღნიშნა, რომ აუცილებელია, საქართველოს ყველა რეგიონს თანაბრად ჰქონდეს განვითარების შესაძლებლობა.

„მიუხედავად რეგიონული მასშტაბის და მოცულობისა, თანაბრად უნდა იყოს გადანაწილებული პოტენციალი ქვეყანაში და რაც მთავარია, ლოკალური პოტენციალი იყოს მაქსიმალურად ათვისებული. ზოგ რეგიონში ეს არის ტურიზმი, ზოგ რეგიონში ეს არის სოფლის მეურნეობა და ასე შემდეგ. ჩვენთვის ახლა მთავარია, გადანაწილდეს პოტენციალი საქართველოს რეგიონებში ისე, რომ არ არსებობდეს, ესე ვთქვათ, ჩამორჩენილი და წინ წასული რეგიონი და მეტ-ნაკლებად თანაბრად გადანაწილდეს, განვითარდეს ქვეყანა“,- განაცხადა შარაშენიძემ.