საქართველოს განათლებისა და მეცნიერების სამინისტროსა და „გუდავაძე-პატარკაციშვილის“ ფონდს შორის, ზოგადი განათლების განვითარების ხელშეწყობის მიზნით, ურთიერთთანამშრომლობის მემორანდუმი გაფორმდა. ამის შესახებ „ინტერპრესნიუსს“ „გუდავაძე-პატარკაციშვილის ფონდიდან“ აცნობეს.
მათივე ინფორმაციით, მემორანდუმს ხელი საქართველოს განათლებისა და მეცნიერების მინისტრის პირველმა მოადგილე ეკატერინე დგებუაძემ და „გუდავაძე-პატარკაციშვილის“ ფონდის დირექტორმა ზურაბ კერვალიშვილმა მოაწერეს.
„ახლად გაფორმებული მემორანდუმი ზოგადი განათლების მიმართულებით სხვადასხვა ასპექტით თანამშრომლობას ითვალისწინებს, მათ შორის, სკოლებში ახალი ეროვნული სასწავლო გეგმის დანერგვის პროცესის ხელშეწყობას, ციფრული სასწავლო რესურსებისა და პლატფორმების განვითარებას, მშობლების, მასწავლებლებისა და დირექტორებისთვის მეთოდოლოგიური გზამკვლევების შემუშავებასა და სკოლის მიღმა დარჩენილი მოსწავლეების სკოლაში დაბრუნების პროგრამის მხარდაჭერას.
ურთიერთთანამშრომლობის ფარგლებში მხარეები არაქართულენოვან სკოლებში ქართულის, როგორც მეორე ენის სწავლების გაუმჯობესებისთვის ერთობლივ პროგრამებსაც განახორციელებენ“, - აღნიშნულია გავრცელებულ ინფორმაციაში.
იხილეთ ვიდეო:საქართველოს განათლებისა და მეცნიერების მინისტრის პირველი მოადგილე შატილის სკოლას ეწვია