წერეთლის გამზირზე პოლიციის შენობის აივნიდან გადმოვარდნილ 46 წლის მამაკაცს, ლევან გაჩეჩილაძეს სასიცოცხლოდ მნიშვნელოვან ყველა ორგანოზე დაზიანება აქვს. აღნიშნულის შესახებ ჟურნალისტებს გერმანული ჰოსპიტლის სამედიცინო დირექტორმა მაია რეხვიაშვილმა განუცხადა.

ემუქრება თუ არა მამაკაცის სიცოცხლეს საფრთხე, ამასთან დაკავშირებით რეხვიაშვილი პაციენტის მძიმე მდგომარეობიდან გამომდინარე, კომენტარს ვერ აკეთებს.

"მე ამას ვერ ვიტყვი და ვერც ვერავინ იტყვის, ამ წუთას ძალიან მძიმე მდგომარეობაა. შეიძლება ითქვას, რომ უმძიმესი, კრიტიკულია, არასტაბილური ჰერმოდინამიკით, კვლავ რჩება რა თქმა უნდა, მართვით სუნთქვაზე. ყველა კვლევა, რომელიც დინამიკაში საჭიროა, ტარდება პაციენტის მდგომარეობიდან გამომდინარე. ყველა სასიცოცხლო ორგანოზე ძირითადად დაზიანება აქვს, რა თქმა უნდა, მეტ-ნაკლები ინტენსივობით",- განაცხადა რეხვიაშვილმა.