„ქართული ოცნების“ აღმასრულებელი მდივნის მამუკა მდინარაძის განცხადებით, მმართველ პარტიაში საკადრო ცვლილებები არ იგეგმება და შესაბამისად, პარტიის გასვლით სხდომაზეც საკადრო ცვლილებებზე არ იქნება მსჯელობა.
როგორც მდინარაძემ ჟურნალისტებს განუცხადა, დღევანდელ გასვლით შეხვედრაზე ყველა მინისტრი საპარლამენტო უმრავლესობის წინაშე წარმოადგენს საკუთარ ხედვას ქვეყნის გრძელვადიან განვითარებასთან დაკავშირებით და სწორედ ამ თემებზე იმსჯელებენ.
„სრული სერიზულობით და მთელი პასუხისმგებლობით შემიძლია გითხრათ, რომ არანაირ ცვლილებაზე არ იქნება საუბარი არც დღეს და არც მომდევნო პერიოდში. მსგავსი საკითხები არ განიხილება. ასევე, დღეს არ განიხილება მერების საკითხი. ანუ პარტიული და საარჩევნო საკითხები დღეს არ განიხილება. აბსოლუტურად სხვა საკითხთან დაკავშირებით ვართ შეკრებილები. დღეს ჩვენ განვიხილავთ სამომავლო გეგმებს და ქვეყნის განვითარების გრძელვადიან პერსპექტივას. საკადრო ცვლილებები მაღალ დონეზე და პარტიულ საკითხთან დაკავშირებით პარტიულ მენეჯმენტში არ იქნება. შეიძლება ადგილობრივ დონეზე იყოს გარკვეული ცვლლილებები, მათ შორის შტაბის უფროსებია დასანიშნი, მაგრამ დღეს ეს საკითხები არ განიხილება“, - აცხადებს მდინარაძე.