”ლელო - პარტნიორობა საქართველოსთვის" ინიციატივა ელიტური კორუფციის შემსწავლელი საგამოძიებო კომისიის შექმნის შესახებ პარლამენტის ბიუროს დღეს წარედგინება

ფრაქცია ”ლელო - პარტნიორობა საქართველოსთვის" ინიციატივა, ელიტური კორუფციის შემსწავლელი საგამოძიებო კომისიის შექმნის შესახებ, პარლამენტის ბიუროს დღევანდელ სხდომაზე წარედგინება.

დადგენილების პროექტის მიხედვით, საგამოძიებო კომისიის გამოსაკვლევ წრედ უნდა განისაზღვროს საქართველოში არსებული და გამოუძიებელი ელიტური კორუფციის ფაქტები, ასევე ამ ფაქტებთან დაკავშირებული სახელმწიფო და ადგილობრივი ხელისუფლების თანამდებობის პირებისა და საჯარო მოსამსახურეების შესაძლო არამართლზომიერი ქმედებები და სამართალდამცავი ორგანოების სავარაუდო უმოქმედობის მიზეზები.

როგორც “ლელოში“ განმარტავენ, 2012 წლის შემდეგ, თითქმის ყველა საერთაშორისო ანტიკორუფციულ რეიტინგში საქართველოს მაჩვენებლები გაუარესდა, ხოლო ელიტურ კორუფციას მზარდ გამოწვევად საქართველოს საერთაშორისო პარტნიორები ასახელებენ.

“საგამოძიებო კომისია შეისწავლის „ქართული ოცნების“ პირობებში დაგროვილ სისტემურ კორუფციას, სადაც ხელისუფლების უმაღლესი თანამდებობის პირები და მათთან დაკავშირებული ადამიანები და კომპანიები მონაწილეობენ.

საპარლამენტო საგამოძიებო კომისიის მიზანია შეისწავლოს სახელმწიფო შესყიდვებში არსებული სისტემური კორუფცია და ბოლო წლებში „ქართული ოცნების“ წარმომადგენლების საეჭვო გამდიდრების შემთხვევები. კერძოდ, კომისია გამოიკვლევს პანდემიის დროს განხორციელებულ საგანგებო შესყიდვებს, სადაც იკვეთება შესაძლო კორუფციული ინტერესები. გარდა ამისა, კომისია გამოიკვლევს ყოფილი და მოქმედი თანამდებობის პირების საეჭვო გამდიდრების ფაქტებს.

ამ პროცესში „ლელო“ აქტიურად ითანამშრომლებს სამოქალაქო ორგანიზაციებთან და სხვა ოპოზიციურ საპარლამენტო ჯგუფებთან, რომელთა ჩართულობაც მნიშვნელოვანია კორუფციის წინააღმდეგ ბრძოლაში პარლამენტის როლის გასაძლიერებლად“, - აცხადებენ საგამოძიებო კომისიის შექმნის ინიციატორები.

ცნობისთვის, პარლამენტი დროებითი საგამოძიებო კომისიის შექმნის საკითხზე გადაწყვეტილებას სრული შემადგენლობის ერთი მესამედის (50 ხმა) მხარდაჭერით იღებს. გადაწყვეტილების მიღებისას მოწინააღმდეგეთა ხმები მხედველობაში არ მიიღება.

ემილ ავდალიანი - ყველაფერი რეგიონში საქართველოს უფრო მზარდ როლზე მოასწავებს, საჭიროა მხოლოდ შექმნილი ვითარების სწორად გამოყენება
ქართული პრესის მიმოხილვა 18.08.2022
ალექსეი გარანი - პუტინს უნდა რომ უკრაინა დათმობებზე წავიდეს, მაგრამ უკრაინა მშვიდობის სანაცვლოდ, ქვეყნის ტერიტორიულ მთლიანობასთან დაკავშირებული საკითხებით ვაჭრობას არ აპირებს
"გალფის" ინიციატივით 100 პირველკურსელს, რომელმაც ერთიან ეროვნულ გამოცდებში უმაღლესი ქულები მიიღო, ერთწლიანი ყოველთვიური სტიპენდია დაენიშნება
„საქართველოს ბანკის“ აქციების ღირებულება რეკორდულ მაქსიმუმზეა
„ევროპელი სოციალისტების” წევრები, დავით ზილფიმიანი და ზაზა მიქაძე ერთობლივ განცხადებას ავრცელებენ
კომპანია PSP ფარმაცევტული სექტორის განვითარებაზე კონცენტრირდება და არაპროფილური ბიზნესებიდან გამოდის