უმრავლესობის წევრის შალვა პაპუაშვილის განცხადებით, პოლიტიკური პარტიები შეთანხმდნენ ძირითად საკითხებზე, რასაც საარჩევნო რეფორმასთან დაკავშირებით ვენეციის კომისიის რეკომენდაციებიდან გაითვალისწინებენ ან ვერ გაითვალისწინებენ.

როგორც პაპუაშვილმა განაცხადა, ერთ-ერთი საკითხი, რასაც ოპოზიციასთან შეთანხმებით ვენეციის კომისიიის რეკომენდაციებიდან ვერ გაიზიარებენ, პარტიული წევრის გამოწვევის დასაბუთებას ეხება.

„კიდევ ერთხელ დადასტურდა, რომ ინტერპარტიული ჯგუფი, რომელიც შექმნილია საარჩევნო თემაზე სამუშაოდ, საკმაოდ ეფექტიანია და კონსტრქუციულია.

დღეს გავიარეთ ვენეციის კომისიის დასკვნა და რეკომენდაციები. ძირითად საკითხებზე იმასთან დაკავშირებით, რას ვითვალისწინებთ და რას ვერ ვითვალისწინებთ, შევთანხმდით.

იურიდიული კომიტეტის სხდომაზე ამ საკითხს პუნქტობრივად გავივლით და დარწმუნებული ვარ, მეორე მოსმენაზეც პარტიების მხრიდან სრული კონსენსუსი იქნება.

ერთ-ერთი რეკომენდაცია, რასაც ვერ ვიზიარებთ, ეხება იმას, პარტიული წევრის გამოწვევას დასაბუთება რომ უნდა სჭირდებოდეს. ოპოზიცია თვლის, რომ უნდა ჰქონდეს სრული შესაძლებლობა, რომ დასაბუთების გარეშეც გამოიწვიონ. ჩვენთვის ეს პრინციპული საკითხი არ ყოფილა, შეგვეძლო გაგვეზიარებინა ვენეციის კომისიის რეკომენდაცია, თუმცა რადგან ოპოზიცია ასე თვლის, კი ბატონო”,- განაცხადა პაპუაშვილმა.