ექიმებში დაახლოებით 21% არის აცრილი, ეს არ არის ცუდი მაჩვენებელი მაგრამ, არც ის საუკეთესო, რომელიც გვინდა, - ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ჟურნალისტებთან საუბრისას განაცხადა.
ამირან გამყრელიძე იმედოვნებს, რომ სამედიცინო პერსონალის აცრის რაოდენობა მოიმატებს.
„დაახლოებით 65 ათასამდე მედპერსონალია დარეგისტრირებული ჩვენს პორტალზე, როდესაც ყველა სამედიცინო დაწესებულებამ ატვირთა თავისი თანამშრომლები, მხედველობაში მაქვს ექიმები, ექთნები, უმცროსი სამედიცინო პერსონალი, დამხმარე პერსონალი. დღევანდელი მონაცემებით, რაც მე მაქვს, 65 000-დან დაახლოებით 12 - 13 ათას ადამიანზე ცოტა მეტია აცრილი, მათ შორის, უმრავლესობა ექიმები.
რაც შეეხება იმას, თუ რატომ არ აიცრნენ დანარჩენები, ორი ფაქტორია. სამწუხაროდ, სამედიცინო სფერომ ყველაზე დიდი დარტყმა მიიღო, ინფიცირებულთა შორის 7-8% არის სამედიცინო სფეროს წარმომადგენელი, თვითონ სამედიცინო სფეროს ამ 65 ათასი ადამიანიდან, 30-33%-მა გადაიტანა სამწუხაროდ კოვიდ ინფექცია. იცით, რომ დაახლოებით 100-ზე მეტი ჩვენი კოლეგა შეეწირა ამ პანდემიას.
ვფიქრობ, სამედიცინო პერსონალის აცრის ინტენსიფიკაცია მოიმატებს, როცა ჩვენ საკმარისი ვაქცინების რაოდენობა გვექნება.
დარწმუნებული ვარ, ამ ზაფხულის განმავლობაში და შემოდგომაზე, ეს პროცენტი უფრო მაღალი იქნება. თუმცა, ხაზს ვუსვამ, რომ ექიმებში დაახლოებით 21% არის აცრილი, ეს არ არის ცუდი მაჩვენებელი, მაგრამ არც ის საუკეთესო, რომელიც გვინდა“, - აღნიშნავს გამყრელიძე.