ანა ბუჩუკური - ჩვენ ვაინიცირებთ კანონპროექტს, რომელიც იქნება სასამართლოში გავლენის ჯგუფების შესუსტებისკენ გადადგმული მნიშვნელოვანი ნაბიჯი

ჩვენ ვაინიცირებთ კანონპროექტს, რომელიც იქნება სასამართლოში გავლენის ჯგუფების შესუსტებისკენ გადადგმული მნიშვნელოვანი ნაბიჯი, - ამის შესახებ პარტია „საქართველოსთვის“ პოლიტსაბჭოს წევრმა, დეპუტატმა ანა ბუჩუკურმა პარტია „საქართველოსთვის" წევრებთან - მიხეილ დაუშვილთან და ბექა ლილუაშვილთან ერთად სასამართლო სისტემაში მიმდინარე პროცესებთან დაკავშირებით ბრიფინგზე განაცხადა.

ბუჩუკურის განცხადებით, ხელისუფლება აგრძელებს მოსამართლეთა დანიშვნის პროცესს 19 აპრილის პოლიტიკური შეთანხმების როგორც სულისკვეთების, ისე მისი შინაარსის საპირისპიროდ, რაც შეთანხმების პირდაპირი დარღვევაა.

მისივე თქმით, პარტია „საქართველოსთვის“ ყველა დაინტერესებულ მხარეს მოუწოდებს, დაუყოვნებლივ დაიწყონ მუშაობა იუსტიციის უმაღლესი საბჭოს რეფორმირებაზე, ვინაიდან ეს არის რეალური საქმე, რაც სჭირდება დღეს ამ სისტემის მიმართ ნდობის აღდგენას, მხარი არ დაუჭირონ უზენაესი სასამართლოს მოსამართლეთა შერჩევის მიმდინარე პროცესს, არ დაუშვან ვაჭრობა იუსტიციის უმაღლესი საბჭოს 5 არამოსამართლე წევრის შერჩევაზე და ხელისუფლებას არ მისცენ შესაძლებლობა, რომ ფორმალური პროცედურების დახვეწისკენ მიმართული ცვლილებები კიდევ ერთხელ წარმოაჩინოს სასამართლოს დამოუკიდებლობისკენ გადადგმულ ნაბიჯად.

„გვსურს საზოგადოებას გავაცნოთ ჩვენი გუნდის - პარტია „საქართველოსთვის“ პოზიცია სასამართლო სისტემაში მიმდინარე პროცესებთან დაკავშირებით. სამწუხაროა, რომ ხელისუფლება აგრძელებს სასამართლო სისტემის მიმართ ნდობის კიდევ უფრო დასუსტების მიზანმიმართულ პროცესს, რაშიც აქტიურად არის ჩართული იუსტიციის უმაღლესი საბჭო და სასამართლოში არსებულ გავლენის ჯგუფებთან აფილირებული ცალკეული მოსამართლეები. ამასთან, ხელისუფლება აგრძელებს მოსამართლეთა დანიშვნის პროცესს 19 აპრილის პოლიტიკური შეთანხმების როგორც სულისკვეთების, ისე მისი შინაარსის საპირისპიროდ, რაც შეთანხმების პირდაპირი დარღვევაა. ჩვენ არაერთხელ განვაცხადეთ, რომ სასამართლო სისტემის მიმართ ნდობის აღდგენის პროცესი იუსტიციის უმაღლესი საბჭოს ფუნდამენტური რეფორმირებით უნდა დაიწყოს. ნებისმიერი ცვლილება თუ ინიციატივა, რომელიც არ ემსახურება პირველ რიგში იუსტიციის უმაღლესი საბჭოს მანდატის გადახედვას, უფლებამოსილების დეცენტრალიზაციისა და საბჭოში ძალის ალტერნატიული ცენტრის შექმნის მიზანს, კიდევ უფრო გაართულებს სასამართლო სისტემაში გავლენის ჯგუფების აღმოფხვრის პროცესს. ამის გარეშე, ხელისუფლების მიერ წარმართული მოსამართლეთა დანიშვნის პროცესი (მიუხედავად ცალკეული მოსამართლეობის კანდიდატების პროფესიონალიზმისა), ისევე როგორც პროცედურების დახვეწისკენ მიმართული მოჩვენებითი ცვლილებები იქნება მხოლოდ და მხოლოდ პოზიტიური გარდაქმნის იმიტაციის მცდელობა და ვერ ისარგებლებს საზოგადოების ნდობით.

აქედან გამომდინარე: 1. მოსამართლეთა დანიშვნის მიმდინარე პროცესი უნდა შეჩერდეს! 2. ჩვენ შევასრულებთ პარლამენტის წევრის მანდატიდან გამომდინარე ფუნქციას - ფიზიკურად დავესწრებით სხდომებს და გამოვიყენებთ ტრიბუნას, რათა კიდევ ერთხელ დავანახოთ საზოგადოებას მიმდინარე პროცესების მანკიერი მხარეები, თუმცა, მხარს არ დავუჭერთ ამგვარი პროცესის საფუძველზე შერჩეულ მოსამართლეთა კანდიდატებს; 3. გარდა ამისა, მოგეხსენებათ, პარლამენტმა უახლოეს მომავალში უნდა აირჩიოს იუსტიციის უმაღლესი საბჭოს 5 არამოსამართლე წევრი, რასაც, კონსტიტუციის მიხედვით, სჭირდება 90 დეპუტატის ხმა. მმართველი პარტიას, როგორც იცით, ჰყავს მხოლოდ 84 დეპუტატი. შესაბამისად, ხელისუფლება აუცილებლად შეეცდება პოლიტიკურ ჯგუფებთან მოლაპარაკებას და, ხმის მიცემის სანაცვლოდ საბჭოს წევრთა რაღაც რაოდენობას შესთავაზებს. ჩვენ არ ვივაჭრებთ ხელისუფლებასთან ან ოპოზიციასთან იუსტიციის უმაღლესი საბჭოს 5 არამოსამართლე წევრზე. მხარს დავუჭერთ მხოლოდ და მხოლოდ დამოუკიდებელ კანდიდატებს, რომელთა ნდობასთან დაკავშირებით არ იარსებებს კითხვის ნიშნები. ჩვენ ამ პროცესს განვიხილავთ, როგორც სისტემაში ძალის ალტერნატიული ცენტრის შექმნისკენ და შესაბამისად გავლენის ჯგუფების შესუსტებისკენ გადადგმულ მნიშვნელოვან ნაბიჯს; 4. ჩვენ მხარს არ დავუჭერთ „ნაციონალური მოძრაობის“ ინიციატივას სასამართლოებში კლანური მმართველობის დროებითი საგამოძიებო კომისიის შექმნაზე, ვინაიდან სასამართლოში გავლენის ჯგუფების არსებობა უკვე შემდგარი ფაქტია და ამ ფონზე ნებისმიერი ასეთი ინიციატივა არა რეალური საქმის კეთებას, არამედ სასამართლოს რეფორმის პოლიტიკური მიზნებისთვის გამოყენებას ისახავს მიზნად, რაც ჩვენთვის მიუღებელია. 5. გარდა ამისა, კრიტიკულად აუცილებელია იუსტიციის უმაღლეს საბჭოში კონცენტრირებული ჭარბი ძალაუფლების ბალანსი. სწორედ ამით უნდა მოხდეს არსებითი გადატეხა მოცემულ ვითარებაში. ამ მიზნით, პარტია „საქართველოსთვის“ უახლოეს დღეებში დააინიცირებს საკანონმდებლო ცვლილებას, რომელიც მიმართულია პირველ რიგში სასამართლოში „გავლენის ჯგუფების“ აღმოფხვრისკენ. ცვლილებით შეიცვლება იუსტიციის უმაღლესი საბჭოს მიერ გადაწყვეტილების მიღების წესი და დაემყარება ე.წ. ორმაგი 2/3-ის პრინციპს. კერძოდ, გადაწყვეტილების მისაღებად საჭირო იქნება საბჭოს მოსამართლე წევრების 2/3-ისა და არამოსამართლე წევრების 2/3-ის თანხმობა", - განაცხადა ანა ბუჩუკურმა.

ვლადიმერ ფესენკო - უკრაინის გარეშე უკრაინის მომავალზე შეთანხმების ნებისმიერი მცდელობები დამარცხებისთვისაა განწირული
დავით თვალაბეიშვილი - ჩვენ მხარს ვუჭერთ ევროკავშირის ენერგეტიკული გაერთიანების მედიაციის გაგრძელებას და მოვუწოდებთ მასში ჩართულ ყველა მონაწილეს, გამოვიყენოთ ეს შესაძლებლობა
ქართული პრესის მიმოხილვა 23.07.2021
თორნიკე შარაშენიძე - ხელისუფლების სერიოზული შეცდომა იყო ვაშინგტონისთვის არასწორი ინფორმაციის მიწოდებაში აშშ-ს ელჩის დადანაშაულება, შესაძლოა, ეს ამბავი მათ მომავალში ცუდადაც კი დაუბრუნდეთ
პირველად საქართველოში - დავით ტატიშვილის სამედიცინო ცენტრში უნიკალური ოპერაცია ჩატარდა
მინერალური წყალი „ბორჯომი“ ახალ კამპანიას იწყებს
„სინერჯი“ თევზის კომპანია „უმალის“ პარტნიორი გახდა
დავით ტატიშვილის სამედიცინო ცენტრმა ამჯერად ახალი ამბულატორიული ცენტრი აჭარის რეგიონში, ბათუმში გახსნა