„ბავშვთა უფლებების დაცვის საზოგადოების“ წარმომადგენლის გურამ ფალავანდიშვილის განცხადებით, ისინი საპროტესტო აქციის გაგრძელებას 19:00 საათამდე გეგმავენ.
როგორც მან აღნიშნა, დღევანდელ აქციაზე კვერცხები და ცარიელი ბოთლები ისროლეს, რაც ფალავანდიშვილის შეფასებით, პროტესტის „მშვიდობიანი ფორმაა“.
„19:00 საათამდე ვიდგებით, თუ შევძლებთ ახლა აქ გზას გადავკეტავთ, რომ არ შევიდნენ. შიგნით შევარდნას არ ვაპირებთ. აქ ქალმა კვერცხები ისროლა, მე ამას ვამართლებ, შეძახილებიც იყო. გინებას და დარტყმას არ ვამართლებ. ჩვენი შვილები ხედავენ, რომ ეს სიბინძურე ტარდება ხალხის პროტესტის ფონზე. რაც შეეხება 5 ივლისს, ის არ უნდა ჩატარდეს. მხოლოდ ერთი შანსია, ჩვენ დავიკავებთ მთელ რუსთაველს, მღვდლებიც იქნებიან თუ პოლიციას ეყოფა ძალა და დაგვხოცავს, მაშინ ჩვენს გვამებზე გაივლიან“, - განაცხადა ფალავანდიშვილმა.
მისი თქმით, მთავრობამ პროვოკაცია არ უნდა დაუშვას.
„ცარიელი ბოთლები იყო, აქ იყო კვერცხები და ეს იყო მშვიდობიანი ფორმა. თუ პოზნერს შეგიძლია კვერცხები ესროლო და მთელი სასტუმრო ჩამოიღო, ჩვენ 3 კვერცხი ვესროლეთ ამ გარყვნილ პროპაგანდისტებს, რა პრობლემააა. აქ ძალადობა არ არის, ხალხი მშვიდობიანად დგას, ოღონდ გამორიცხული არ არის არც პოლიციის მხრიდან უზრდელობა და არც ხალხის მხრიდან გადაჭარბება, ამიტომ, პროვოკაცია მთავრობამ არ უნდა დაუშვას, თორემ არ არის გამორიცხული, ვიღაც რომ უყურებს ტელევიზორში, პოლიცია გვირტყამს და გვაგინებს, შეიძლება, მოვარდეს და აქეთ დაარტყას, მე არ ვამტყუნებ, თუმცა, ძალადობის მომხრე არ ვარ“,-განაცხადა ფალავანდიშვილმა.
ცნობისთვის, ადგილზე, სადაც “თბილისი პრაიდის“ ღონისძიება უნდა გაიმართოს, კვირეულის მოწინააღმდეგეები იმყოფებიან.