სამწუხაროა და სერიოზული რეპუტაციული ზიანი ადგება ამ შემთხევაში ქვეყანას, როდესაც ყველა ანგარიშში, რაც კი საქართველოს შესახებ ყოფილა და სადაც საქართველოა ნახსენები, სამწუხაროდ, იქვეა ნახსენები პრობლემები მართლმსაჯულებაში, სასამართლოში და ეს არ არის მხოლოდ საერთო სასამართლოების ზიანი, ეს არის ზიანი, რომელიც ადგება მთელ ქვეყანას. თუმცა, იუსტიციის უმაღლესი საბჭო მოიქცა კანონის დაცვით,- ასე ეხმაურება საკონსტიტუციო სასამართლოს მოსამართლე ირინა იმერლიშვილი უზენაეს სასამართლოში მოსამართლეთა დანიშვნის შეჩერების საკითხს.
მისი განმარტებით, იუსტიციის უმაღლესი საბჭო კანონის შესაბამისად მოიქცა.
„როდესაც გადაწყვეტილება მიიღეს პოლიტიკურმა პარტიებმა და ხელი მოაწერეს შარლ მიშელის დოკუმენტს, მათი პასუხისმგებლობა იყო ისიც, რომ თუ ამ გადაწყვეტილებაში წერია, რომ უნდა შეჩერდეს თუ დაპაუზდეს ესა თუ ის პროცესი, მიიღონ ისეთი კანონმდებლობა, რომელიც ამის იმპლემენტაციას მოახდენს და შემდეგ ამის საშუალებას მისცემდა იუსტიციის უმაღლეს საბჭოს. დღეს, იუსტიციის უმაღლესი საბჭო მოიქცა ისე, როგორც წერია კანონში და ისინი არ არიან პასუხისმგებლები პოლიტიკურ გადაწყვეტილებებზე. შესაბამისად, როდესაც იუსტიციის უმაღლესი საბჭოს წევრები საუბრობენ, რომ „ჩვენ ვიმოქმედეთ კანონის სრული დაცვით“, ნამდვილად ასე წერია კანონში, რომ როდესაც, ერთი მხრივ, უფლებამოსილება გაუვა საბჭოს წევრებს, საბჭოს წევრები მათი ასარჩევია. მეორე მხრივ, უზენაესი სასამართლო, როდესაც უნდა შეივსოს და იქ პროცესის ვადებიც წერია, ისინი შესაბამისი პროცედურით იმოქმედებენ ამ ვადებში. თუმცა, ვიმეორებ, ეს პასუხისმგებლობა აღებულია პოლიტიკოსების მიერ. საქართველოს პარლამენტი პასუხისმგებელია იმაზე, რომ კანონმდებლობაში ყოფილიყო ცვლილები, თუკი ამას მოითხოვდა საერთაშორისო თანამეგობრობა, - აცხადებს ირინა იმერლიშვილი.