პარლამენტის 91 დეპუტატის ხელმოწერით ინიცირებული კონსტიტუციური კანონის პროექტი ბიუროს 6 ივლისის სხდომაზე წარედგინება.

ბიურო ხელმოწერების ნამდვილობის შემოწმების მიზნით, პროექტს საპროცედურო საკითხთა და წესების კომიტეტს გადასცემს. ამის შემდეგ პარლამენტი უახლოესი პლენარულ სხდომაზე, კონსტიტუციური კანონპროექტის საყოველთაო-სახალხო განხილვის საორგანიზაციო კომისიის შექმნის გადაწყვეტილებას მიიღებს.

კონსტიტუციურ კანონპროექტი პარლამენტში 29 ივნისს დარეგისტრირდა. პროექტს "ქართული ოცნების" წევრებთან ერთად, ხელს აწერენ: "მოქალაქეების", "გირჩის", "სტრატეგია აღმაშენებლის" და “ლელოს“ წარმომადგენლები.

მმართველი გუნდისა და ოპოზიციის კონსულტაციების შედეგად შეჯერებული პროექტის მიხედვით, მომდევნო ორი საპარლამენტო არჩევნებისთვის საარჩევნო ბარიერი 2%-ია. ასევე, დადგენილია მანდატების პროპორციული განაწილების წესი.

საკონსტიტუციო ცვლილებების პროექტის მეორე პუნქტით, საპარლამენტო ფრაქციების შესაქმნელად წევრთა რაოდენობა შვიდიდან ოთხ წევრამდე ჩამოდის.

ამავე პროექტით, შემდეგი გენერალური პროკურორები კვალიფიციური უმრავლესობით აირჩევიან, ხოლო თუკი კვალიფიციური უმრავლესობით არჩევა ვერ მოხდება, საკმარისი იქნება 76 დეპუტატის მხარდაჭერა.

პარლამენტი კონსტიტუციური კანონის პროექტის განხილვას მისი გამოქვეყნებიდან 1 თვის შემდეგ დაიწყებს.