გივი მიქანაძე 5 ივლისს განვითარებულ მოვლენებზე - თუ გადაცდომები ან მდგომარეობა გამოიკვეთება, როცა პოლიციამ არ იმოქმედა და უნდა ემოქმედა, ამას სამართლდამცავი ორგანოები შეისწავლის
თუ გამოიკვეთება კონკრეტული გადაცდომები ან მდგომარეობა, როცა პოლიციამ არ იმოქმედა და უნდა ემოქმედა, ამ საკითხებს სამართლდამცავი ორგანოები შეისწავლის, - ამის შესახებ ჟურნალისტებთან საპარლამენტო უმრავლესობის წევრმა გივი მიქანაძემ გუშინ განვითარებულ მოვლენებთან დაკავშირებით განაცხადა, რომლის დროსაც 50-მდე ჟურნალისტი და ოპერატორი დაშავდა.
მისი თქმით, პოლიციამ გააკეთა მაქსიმუმი, რომ საზოგადოებრივი წესრიგი დაცული ყოფილიყო.
„პოლიციის ძალები იყო მაქსიმალურად მობილიზებული, თითოეული ფაქტის შესწავლა მოხდება სიღმისეულად და თუ იქ მოხდა გადაცდომა, კონკრეტული პირების პასუხისმგებლობა დადგება. ის ფაქტი, რომ ასეთი ძალადობრივი ქმედება მოხდა, არის აბსოლუტურად მიუღებელი და დაუშვებელი. ჩვენ ვიცოდით, რომ ეს ღონისძიება დაგეგმილი იყო საღამოს საათებში, თუმცა, იქ დილიდან პოლიციის გარკვეული ძალები იყო მობილიზებული შესაბამის ლოკაციებზე, როცა ხალხმა დაიწყო მობილიზება, თუმცა, ეს ლოკაციები ძალიან გაიშალა სხვადასხვა წერტილში და შესაბამისად, გართულდა ხალხის რაოდენობიდან გამომდინარე", - განაცხადა მიქანაძემ.
