შს მინისტრის მოადგილის განცხადებით, სიცრუეა ინფორმაცია, თითქოს უცხოელი ტურისტის დაჭრა „პრაიდს“ უკავშირდება
შინაგან საქმეთა მინისტრის მოადგილის, ალექსანდრე დარახველიძის განცხადებით, უცხოელი ტურისტის დაჭრა „პრაიდს“ არ უკავშირდება და ეს შემთხვევა საყოფაცხოვრებო ნიადაგზე მოხდა.
მისი თქმით, ფაქტთან დაკავშირებით დაკავებულია ბრალდებული და ჩატარდება შესაბამისი ექსპერტიზა.
„ტურისტთან დაკავშირებით მოგახსენებთ - აღნიშნული ფაქტი მოხდა სრულიად დამოუკიდებლად - ეს მოხდა ხეთაგუროვის ქუჩაზე, სადაც როგორც ჩვენთვის ცნობილია და დედამაც გააკეთა განცხადება, ფსიქიურად დაავადებული ადამიანი თავს დაესხა უცხოელ ტურისტს.
არანაირი კავშირი ამ ფაქტს იმ ფაქტებთან არ აქვს რაზეც საუბარი იყო, რომ თითქოს ეს პრაიდს უკავშირდება, ეს სიცრუეა. არანაირ დაპირისპირებას ადგილი არ ჰქონია იქ, მიეჭრა ეს კონკრეტული პირი. ფაქტი მოხდა სულ სხვა ლოკაციაზე, სულ სხვა ადგილას. ჩვენ დაწყებული გვაქვს გამოძიება, დაკავებულია იცით ეს პირი, ჩატარდება შესაბამისი ექსპერტიზა და გვეცოდინება საბოლოო პასუხი“, - განაცხადა ალექსანდრე დარახველიძემ.
