პროკურორ თამარ იაკობიძის ინფორმაციით, „ინტერპრესნიუსის“ ფოტოკორესპონდენტსა და კიდევ ორი მედიასაშუალების თანამშრომლებზე თავდასხმისთვის ბრალდებული 5 პირისთვის აღკვეთის ღონისძიების საკითხზე პროკურატურა თბილისის საქალაქოს სასამართლოს დღეს მიმართავს.
მისივე თქმით, პროკურატურის მიმართვის შემდეგ უკვე სასამართლოზეა დამოკიდებული თუ როდის გაიმართება სასამართლო პროცესი.
„მოცემულ სისხლის სამართლის საქმეზე დაკავებულ კიდევ 5 პიროვნებას წარედგინა ბრალდება, აღკვეთის ღონისძიების შუამდგომლობა დღის განმავლობაში შევა სასამართლოში და შემდეგ უკვე სასამართლოზეა დამოკიდებული როდის ჩანიშნავენ პროცესს”, - აღნიშნა პროკურორმა.
ცნობისთვის, საქართველოს პროკურატურამ 5 ივლისს, „თბილისი პრაიდის” საწინააღმდეგოდ გამართული აქციის დროს, მედიასაშუალებების წარმომადგენლების მიმართ ჟურნალისტური საქმიანობის გამო განხორციელებული დევნის, დისკრიმინაციის შემცველი სხვა ნიშნით შეუწყნარებლობის მოტივით ჟურნალისტისთვის პროფესიულ საქმიანობაში უკანონოდ ხელის შეშლის და შეუწყნარებლობის მოტივით ჯგუფურ ძალადობაში მონაწილეობის ფაქტზე ხუთ პირს - ც.ჩ-ს, ბ.მ-ს, თ.გ-ს, ო.გ-ს, მ.დ-ს ბრალი წარუდგინა.