პარლამენტის საპროცედურო საკითხთა და წესების კომიტეტის სხდომა, სადაც 52 ოპოზიციონერი დეპუტატის უფლებამოსილების შეწყვეტის საკითხი უნდა განიხილონ, 12 ივლისისთვის ჩაინიშნა.
კომიტეტის სხდომა აღნიშნული დღის წესრიგით 9 ივლისს უნდა გამართულიყო, მაგრამ დეპუტატების არმისვლის და შესაბამისად, კვორუმის პრობლემის შექმნის გამო, გადაიდო.
კონსტიტუციისა და რეგლამენტის მიხედვით, თუკი პარლამენტის წევრი, სესიის განმავლობაში, არასაპატიო მიზეზით პლენარული სხდომების ნახევარზე მეტს გააცდენს, ეს სადეპუტატო უფლებამოსილების ვადამდე შეწყვეტას იწვევს.
სწორედ 52 ოპოზიციონერი დეპუტატია, რომელთაც 31 ოქტომბრის არჩევნების შედეგები საპარლამენტო საქმიანობაში ჩართვაზე უარის თქმით გააპროტესტეს. შესაბამისად, მათ იმ რაოდენობის არასაპატიო გაცდენა დაუგროვდათ, რომ დღის წესრიგში კვლავ უფლებამოსილების შეწყვეტის საკითხი დგება.
"საპროცედურო საკითხთა და წესების კომიტეტი ყველა შემთხვევაში დასკვნას მოამზადებს და პლენარულ სხდომას გადასცემს. პარლამენტი თითოეულ მათგანზე ცალ-ცალკე მიიღებს გადაწყვეტილებას", - განაცხადა კომიტეტის თავმჯდომარემ ირაკლი ქადაგიშვილმა.