ერთი რამე მინდა ვთქვა - უკვე მრავალი წელია მიმდინარეობს ძალადობა და აგრესია, ეს ძირითადად მოდის ტელევიზიებიდან, ასევე პოლიტიკოსებიდან. თქვენ, ჟურნალისტებს, ბრალს არ გდებთ, მაგრამ ისინი, ვინც ტელევიზიაში ამინდს ქმნიან, ვინც ამას უკვეთავენ, აბსოლუტურად ყველას სინდისზეა მომხდარი, - ამის შესახებ ბოდბელმა მთავარეპისკოპოსმა, მეუფე იაკობმა 5-6 ივლისს თბილისში განვითარებულ მოვლენებსა და ოპერატორ ალექსანდრე ლაშქარავას გარდაცვალების შესახებ საუბრისას განაცხადა.

„ძალიან სამწუხაროა, გუშინ ახალგაზრდა კაცი გარდაიცვალა. მას ფიზიკურად გაუსწორდნენ. ცოტა ხანში ალბათ გავიგებთ რატომ გარდაიცვალა, მაგრამ გული დაგვწყვიტა. სამწუხაროა, როცა ახალგაზრდა კაცი მიდის და ასე გვამახსოვრდება.

ვინც მართლა განიცდის მის სიკვდილს, ღმერთმა დალოცოს. არ შეიძლება ადამიანის სიკვდილი არ გვებრალებოდეს. მთელ საქართველოს ვუსამძიმრებ და პირველ რიგში ოჯახს ვუსამძიმრებ ამ ახალგაზრდა კაცის გარდაცვალებას. სიმართლე, ალბათ, დადგინდება. რა მიზეზითაც არ უნდა იყოს გარდაცვლილი, რთულია ადამიანის გასვლა ამ ქვეყნიდან. მართლაც გული დაგვწყვიტა“, - განაცხადა მეუფე იაკობმა.