მედიასაშუალებების წარმომადგენლების მიმართ ჟურნალისტური საქმიანობის გამო განხორციელებული დევნის და ძალადობის ფაქტებზე ბრალდებულების საქმის პროკურორის, თამარ იაკობიძის განცხადებით, გამოძიება ორგანიზატორების გამოვლენის მიზნით აქტიურად მიმდინარეობს.
აღნიშნულის შესახებ იაკობიძემ სასამართლო პროცესის დაწყებამდე ჟურნალისტებს განუცხადა.
"გამოძიება მიმდინარეობს ორგანიზატორების დადგენის მიმართულებით. კონკრეტული ძალადობის ეპიზოდებთან მიმართებაში დაზარალებული პირების ჩართულობით შედარებით უფრო მარტივია კონკრეტული პირების მიმართ მტკიცებულებების მოპოვება, მოცემულ შემთხვევაში შედარებით მოცულობითია სამუშაო ორგანიზატორებთან მიმართებით", - განაცხადა იაკობიძემ.
ცნობისთვის, “თბილისი პრაიდის” საწინააღმდეგოდ გამართული აქციის საქმეზე მიმდინარე გამოძიების ფარგლებში, ამ დროისთვის, ბრალი 21 პირს წარედგინა. ამ ეტაპზე, საქმეზე დაზარალებულად ცნობილია 36 პირი, მათ შორის 30 ჟურნალისტი და ოპერატორი.