საპროცედურო საკითხთა და წესების კომიტეტის თავმჯდომარის, ირაკლი ქადაგიშვილის განცხადებით, ოპოზიცია ცდილობს ტრაგედია პოლიტიკური მიზნებისთვის გამოიყენოს მაშინ, „როცა ხელისუფლებას პირდაპირი დანაშაული ამა თუ იმ ტრაგედიის მოხდენაში არ აქვს“. აღნიშნული განცხადებით ქადაგიშვილი ჟურნალისტებთან ოპერატორ ლექსო ლაშქარავას გარდაცვალებასთან დაკავშირებით ოპოზიციის განცხადებებს გამოეხმაურა.
მისი თქმით, ის არ გულისხმობს იმას, რომ ხელისუფლებამ რაიმეზე პასუხისმგებლობა უნდა აირიდოს, თუმცა, ოპოზიციას ხელისუფლებასთან ოპონირების სხვა დღის წესრიგი არ აქვს.
„ჩვენ სამწუხაროდ ვნახეთ, ბევრ შემთხვევაში ადამიანების სიკვდილით როგორ სპეკულირებდა ოპოზიცია, ბაჩალიაშვილის, შაქარაშვილის შემთხვევაში. ბევრი ასეთი შემთხვევაა, როცა ადამიანი კვდება და იწყება აღვირახსნილი კამპანია იმის, რომ ამ ადამიანის სიკვდილის გამო, ხელისუფლება უნდა გადადგეს. ოპოზიციას სხვა დღის წესრიგი ხელისუფლებასთან ოპონირების და ხელისუფლებაში მოსვლის არ აქვს, გარდა იმისა, რომ ასე უსინდისოდ გამოიყენონ ადამიანის ტრაგედია,"- განაცხადა ქადაგიშვილმა.