მიმდინარე წლის 13-14 ივლისს, საქართველოს ეროვნული უნივერსიტეტი სეუ–ს მხარდაჭერით, ახალგაზრდობის სააგენტომ და საქართველოს ახალგაზრდულ მუშაკთა ასოციაციამ, ევროკავშირის ტექნიკური მხარდაჭერის პროექტის „განათლება დასაქმებისთვის" (Skills4Jobs) და გაეროს სააგენტოებთან თანამშრომლობითა საქართველოს ეროვნულ უნივერსიტეტ სეუ–ში კონფერენცია “ახალგაზრდული საქმიანობის დღის წესრიგი 2025” გამართა. ამის შესახებ ინფორმაციას ახალგაზრდობის სააგენტო ავრცელებს.

მათი ინფორმაციით, ჰიბრიდული ღონისძიების გახსნით ნაწილში აუდიტორიას, საქართველოს ეროვნული უნივერსიტეტი სეუ–ს ვიცე რექტორი, ანა ფირცხალაშვილი მიესალმა. კონფერენცია მიზნად ისახავდა ახალგაზრდული სფეროს აქტორების ცნობადობის გაზრდას ბონის პროცესისა და ახალგაზრდული საქმიანობის ევროპული დღის წესრიგის შესახებ და სახელმწიფო ახალგაზრდული სტრატეგია 2025-ს 3-წლიანი სამოქმედო გეგმის განვითარებას, ბონის პროცესის დეკლარაციის მიხედვით.

„ორი დღის მანძილზე კონფერენციაში ჩართული ახალგაზრდული სფეროსა და ახალგაზრდული საქმიანობის სხვადასხვა აქტორები, მათ შორის საქართველოს ეროვნული უნივერსიტეტი სეუ–ს თანამშრომლები, დეტალურად გაეცნენ ბონის პროცესს და ერთობლივად შეიმუშავეს სამოქმედო გეგმა თუ როგორ აისახება ბონის დეკლარაცია სახელმწიფო ახალგაზრდული სტრატეგია 2025–ის სამოქმედო გეგმაში.

სტრატეგიის და სამოქმედო გეგმის შემუშავების პროცესში ახალგაზრდობის სააგენტოს მხარდაჭერას უწევს გაეროს საკოორდინაციო ჯგუფი ახალგაზრდობის საკითხებზე (UNFPA, UNICEF, UNDP, UNIDO, ILO, UNHCR) და ევროკავშირის ტექნიკური მხარდაჭერის პროექტი საქართველოში „განათლება დასაქმებისთვის” (Skills4Jobs)“, - ნათქვამია ინფორმაციაში.