ორთაჭალაში, საქართველოს გენერალურ პროკურატურასთან სხვადასხვა მედიის წარმომადგენლებმა 5-6 ივლისს პარლამენტის წინ მიმდინარე აქციის ორგანიზატორებზე გამოძიების დაწყების და სისხლის სამართლის საქმის აღძვრის მოთხოვნით გენერალური პროკურორის, ირაკლი შოთაძის სახელზე განცხადება შეიტანეს.
აქციის ორგანიზატორები ასევე მოითხოვენ ტელეკომპანია „ალტ-ინფოს” დაფინანსების წყაროს მოძიებას. მათი ინფორმაციით, დღევანდელ განცხადებას 200-ზე მეტი ადამიანი აწერს ხელს.
„ფორმულას“ ჟურნალისტის, ვახო სანაიას განცხადებით, დღეს ჩატარებული საგამოძიებო მოქმედებები არის ფონის შექმნა, თითქოს ხელისუფლება „რაღაცას აკეთებს“ თუმცა, მათ აუცილებლად მოუწევთ „თავისივე ორგანიზებული ჯგუფების წარმომადგენელთა დაკავება“.
„ჩვენი საპროტესტო აქციების და საერთაშორისო საზოგადოების გამოხმაურების შემდეგ ხელისუფლებამ დაიწყო ფონის შექმნა, რომ თითქოს რაღაცას აკეთებს. ეს რეალურად არის უკან დახევა, მათ მოუწევთ თავისივე ორგანიზებული ჯგუფების წარმომადგენელთა დაკავება, ჩვენ არ გავჩერდებით და არ შევეგუებით, გვაქვს კადრები სადაც პირდაპირ ჩანს სისხლის სამართლებრივი დანაშაული. მახარაძე, მორგოშია, ყველანი დასაჭერები არიან რადგან დანაშაული ჩაიდინეს, ქუჩაში დასდევდნენ ჩვენს ჟურნალისტებს და სასტიკად უსწორდებოდნენ. მაგრამ, ეს არ უშველის ღარიბაშვილს, ის უნდა გადადგეს და პასუხი აგოს“, - აღნიშნა ვახო სანაიამ.