თუკი ვინმეს შარლ მიშელის დოკუმენტის ინტერპრეტაციის შედეგად ჰქონდა მოლოდინი იმისა, რომ უზენაესს სასამართლოში დანიშვნები არა ამ პოლიტიკურ გუნდს, არამედ სხვას უნდა გაეკეთებინა, ეს სხვა თემაა, მაგრამ შარლ მიშელის დოკუმენტში ასეთი რამ ნამდვილად არ წერია და არც იკითხება, - ასე უპასუხა "ქართული ოცნების" ერთ-ერთმა ლიდერმა მიხეილ სარჯველაძემ პარლამენტის მიერ უზენაესი სასამართლოს მოსამართლების დანიშვნაზე დასმულ კითხვას.
სარჯველაძე იმასაც ამბობს, რომ დანიშვნის პროცესის შეჩერებას თავისი ახსნა და საფუძველი უნდა ჰქონდეს და "არ შეიძლება კონსტიტუციის მიხედვით არმუშაობა, პოლიტიკური მიზანშეწონილობით გავამართლოთ".
სარჯველაძემ ხაზგასმით აღნიშნავს, რომ რეფორმა, რასაც გავლენა შეიძლება მოეხდინა უზენაესი სასამართლოს მოსამართლეების არჩევაზე, უკვე განხორციელებულია.
"არ მგონია, რომ ვართ კრიზისისკენ მიმავალ გზაზე. ფაქტია, რომ ჩვენი მოსაზრებები მოსამართლეთა დანიშვნის საკითხების ირგვლივ განსხვავდება. ჩვენ ვთვლით და შარლ მიშელის დოკუმენტს ასე ვკითხულობთ: - რელევანტური რეფორმა, რომელიც კავშირში შეიძლება ყოფილიყო უზენაესი სასამართლოს მოსამართლეების არჩევასთან, პარლამენტის მხრიდან ვენეციის კომისიის დასკვნის გათვალისწინებით, საკანონმდებლო ცვლილებების სახით განხორციელდა. ჩვენ ეს ცვლილებები განვახორციელეთ! თუკი ვინმეს სხვა მოლოდინი ჰქონდა, ეს დოკუმენტში უნდა ჩაწერილიყო. სხვა ისეთი რელევანტური რეფორმა, რაც პარლამენტის მიერ მოსამართლეების არჩევაზე გავლენას მოახდენდა, დოკუმენტში არ წერია. ეს იმას არ ნიშნავს, რომ ზოგადად, სასამართლო ხელისუფლებაში რეფორმები არ უნდა გაგრძელდეს, მაგრამ შეჩერების საკითხზე რომ ვისაუბროთ, ეს ბმაში უნდა იყოს ისეთ რეფორმასთან, რაც გავლენას ახდენს. კანონმდებლობაში დაგეგმილი რეფორმა, საპარლამენტო ეტაპზე უზენაესი სასამართლოს მოსამართლეების არჩევას არ გაითვალისწინებდა, გარდა ერთისა, რომელიც უკვე განხორციელდა", - განაცხადა მიხეილ სარჯველაძემ.