საქართველოს საზოგადოებრივი მაუწყებლის ოპერატორი ილია თვალიაშვილი, რომელსაც 5 ივლისს აქციაზე თავს დაესხნენ, კვლავ კლინიკაშია.

როგორც „ინტერპრესნიუსს“ თვალიაშვილის მეუღლემ, გვანცა ქართველიშვილმა განუცხადა, მას თავის ტკივილი და თავბრუსხვევა აწუხებდა, დღეს კლინიკაში გეგმური შემოწმება უწევდა, სადაც ჩათვალეს საჭიროდ, რომ თვალიაშვილი ნევროპათოლოგს ენახა.

როგორც ქართველიშვილი განმარტავს, მის მეუღლეს კვლევებს ჩაუტარებენ, შედეგები კი, ხვალ, დღის მეორენახევარში გახდება ცნობილი.

ცნობისთვის, ილია თვალიაშვილი „ნიუ ჰოსპიტალსიდან“ 8 ივლისს გაწერეს. გამოძიების ინფორმაციით, მიმდინარე წლის 5 ივლისს, თბილისში, რუსთაველის გამზირზე, "თბილისი პრაიდის" საწინააღმდეგოდ გამართული აქციის მიმდინარეობის დროს, ბრალდებულმა „საზოგადოებრივი მაუწყებლის“ ოპერატორს სამსახურებრივი მოვალეობის შესრულებისას ფიზიკური და სიტყვიერი შეურაცხყოფა მიაყენა.

გამოძიება საქართველოს სისხლის სამართლის კოდექსის 154-ე მუხლის მე-2 ნაწილით, 156-ე მუხლის მე-2 ნაწილის "ა" ქვეპუნქტით და 225-ე მუხლის მე-2 ნაწილით მიმდინარეობს.