რბილად რომ ვთქვათ, არ გვაქვს ძალიან მეგობრული ურთიერთობები ოპოზიციის დიდ ნაწილთან - ჩვენ გვაქვს ჩვენი გზა ამ არჩევნებზე, - ამის შესახებ ჟურნალისტებთან „მოქალაქეების“ წევრმა, ვიცე-სპიკერმა ლევან იოსელიანმა განაცხადა.

მისი თქმით, იქნება თუ არა თბილისის მერობის კანდიდატი „მოქალაქეებიდან“ ალეკო ელისაშვილი, ამაზე განცხადებას თავად ელისაშვილი გააკეთებს. რაც შეეხება ოპოზიციას, როგორც იოსელიანი აცხადებს, საერთო კანდიდატზე შეთანხმებას „პირი არ უჩანს“.

„მე არ ვიცი, რაიმე კონსულტაცია თუ მიმდინარეობს ოპოზიციაში საერთო კანდიდატზე, ჩვენ ოპოზიციის დიდ ნაწილთან რბილად რომ ვთქვათ, არ გვაქვს ძალიან მეგობრული ურთიერთობები, ამიტომ ჩვენ გვაქვს ჩვენი გზა ამ არჩევნებზე. ვაპირებთ, რომ თბილისში დავაყენოთ ძალიან საინტერესო და კარგი კანდიდატები, ალეკო იქნება თუ არა მერობის კანდიდატი ალბათ, თვითონ გააკეთებს ამაზე განაცხადს სულ რამდენიმე დღეში", - განაცხადა იოსელიანმა.