მოვიდეს გომელაური პარლამენტში თუ არ შეეშინდება, - ამის შესახებ ჟურნალისტებთან ფრაქცია „ნაციონალური მოძრაობა - გაერთიანებული ოპოზიცია - ძალა ერთობაშიას“ თავმჯდომარე ხატია დეკანოიძემ განაცხადა.
როგორც მან აღნიშნა, გომელაურს კითხვებზე პასუხი არ აქვს.
„მათ სხდომა იმიტომ შეწყვიტეს, რომ ბანერი გადმოფინეს ჟურნალისტებმა. მე მქონდა საშუალება მას დარბაზში პირისპირ გავსაუბრებოდი, ზუსტად ის კითხვა დავუსვი, რაც თქვენ გაქვთ - რატომ ვერ მოახერხა პოლიციამ დაეცვა ადამიანის მთავარი უფლება, დაეცვა სიცოცხლის უფლება, როცა პირდაპირ ძალადობრივი მოწოდებები ისმოდა და ძალადობრივი ჯგუფების ორგანიზატორები დღემდე არიან თავისუფლებაზე. მან მიპასუხა, რომ გამოძიება მიმდინარეობს და ხალხის სიმრავლის გამო ვერ მოახერხა პოლიციამ დაეცვა ჟურნალისტები. ჩვენ ყველას ძალიან კარგად გვახსოვს ოპოზიციის პროტესტი როცა იმართება, პოლიციის რამხელა მობილიზაცია ცხადდება ხოლმე. მე როგორც ამ სფეროში დიდი ხნის გამოცდილების მქონეს, მინდა გითხრათ, რომ პოლიციის თბილისის გარნიზონს აქვს ადეკვატური შესაძლებლობა, რომ დაიცვას ადამიანის სიცოცხლე და დაიცვას პროტესტის და შეკრების თავისუფლება“, - განაცხადა დეკანოიძემ.