კალაძემ ისე დაიწყო საკუთარი საარჩევნო კამპანია, რომ მისი რეიტინგი, თუ ის სცდება „ქართული ოცნებისას“, ძალიან სწრაფად დავა „ქართული ოცნების“ რეიტინგის დონემდე,- ამის შესახებ ფრაქცია „ლელო - პარტნიორობა საქართველოსთვის“ წევრმა სალომე სამადაშვილმა განაცხადა, რითაც „ქართული ოცნების“ მხრიდან დედაქალაქის მერობის კანდიდატად კახა კალაძის კანდიდატურის დასახელებას გამოეხმაურა.

როგორც სამადაშვილმა აღნიშნა, არ ფიქრობს, რომ „ქართული ოცნების“ რომელიმე წარმომადგენელს, მათ შორის კალაძეს, არჩევნებში უპირობო გამარჯვების შანსი ჰქონდეს.

„არსებობს ცნება - მოკლე სათადარიგო სკამი, როდესაც ძალიან ცოტა ადამიანია რიგში, ვინც შეიძლება, რომ სათამაშოდ გამოვიდეს. „ქართული ოცნების“ შემთხვევაში ეს სკამი მოკლე კი არ არის, უბრალოდ, არ არსებობს. ამიტომ არანაირი სხვა არჩევანი „ქართულ ოცნებას“ არ ჰქონდა, გარდა კალაძისა. მგონი, სიურპრიზი არავისთვის იყო, რომ მმართველი გუნდის მხრიდან ეს ადამიანი დასახელდა იმიტომ, რომ თუ რაიმე რეიტინგი ვინმეს შერჩა „ქართული ოცნებაში“, ეს კალაძეა“,- განაცხადა სამადაშვილმა.