პარტია „საქართველოსთვის“ წევრებმა - გიორგი კიკნაველიძემ, რუსუდან თევზაძემ და ტატა ხვედელიანმა განათლებისა და კულტურის პლატფორმის ფარგლებში, მუსიკოსებთან, მომღერლებთან და კომპოზიტორებთან სამუშაო შეხვედრა გამართეს.
როგორც „ინტერპრესნიუსს“ პარტიიდან აცნობეს, შეხვედრაზე სფეროში არსებული გამოწვევები, რეკომენდაციები და პრობლემების გადაჭრასთან დაკავშირებით არსებული მოსაზრებები განიხილეს.
„გამოიკვეთა რამდენიმე მნიშვნელოვანი საკითხი, მათ შორის აღინიშნა, რომ სფეროს წარმომადგენელთა საქმიანობის და შემოქმედებითი განვითარების ხელშეწყობის თვალსაზრისით არ არსებობს საერთო ხედვა; ასევე, ყურადღება გამახვილდა იმ ხარვეზებზე, რომელიც სახელმწიფოს მხრიდან დაფინანსების ხელმისაწვდომობის კუთხით არსებობს.
შეხვედრაზე პრობლემების მოგვარების გზებთან დაკავშირებით საუბრისას გაჟღერდა ინიციატივა, რომელიც ევროპულ და ზოგადად დასავლურ საუკეთესო პრაქტიკაზე დაყრდნობით კულტურის სფეროს წარმომადგენლებით დაკომპლექტებული ქმედითი მექანიზმის შექმნას ითვალისწინებს, რომლის წევრებმა, საკუთარი გამოცდილებიდან გამომდინარე, უნდა უზრუნველყონ არსებული გამოწვევების სრულად იდენტიფიცირება და მათი აღმოფხვრის თანამედროვე / ეფექტიანი მექანიზმების განსაზღვრა, რამაც საბოლოო ჯამში ხელი უნდა შეუწყოს კულტურის სფეროს წარმომადგენელთათვის შესაძლებლობების თანაბარ ხელმისაწვდომობას“, - აღნიშნულია პარტიის მიერ გავრცელებულ ინფორმაციაში.