რამდენი ხანი შეიძლება ეს კითხვა დაისვას, როდემდე შეიძლება აქტუალური იყოს? - ასე მიმართა თავდაცვის მინისტრმა ჯუანშერ ბურჭულაძემ ჟურნალისტებს კითხვის საპასუხოდ, უნდა აიღოს თუ არა პრემიერ-მინისტრმა ირაკლი ღარიბაშვილმა პასუხისმგებლობა 5-6 ივლისს განვითარებულ მოვლენებთან დაკავშირებით.
ჯუანშერ ბურჭულაძის განცხადებით, დროა, ამ კითხვების დასმა შეწყდეს და გავაგრძელოთ ცხოვრება ყოველდღიურ რეალობაში.
„უნდა ვიცხოვროთ ყოველდღიურ რეალობაში. დამნაშავეები აუცილებლად დაისჯებიან, ეს პროცესი მიმდინარეობს. დაკავებულია ათობით, ასობით პირი. თუ მეკითხებით სამართლებრივად გამართულია თუ არა პროცესი, სამართლებრივი კითხვა დამისვით მაშინ. ვინ არის ორგანიზატორი და რა დანაშაული მიუძღვით მათ? მიპასუხეთ და რაზე არ მოახდინა რეაგირება ხელისუფლებამ?“ - განაცხადა ბურჭულაძემ.