პარლამენტის უკანა შესასვლელთან, რიგგარეშე პლენარული სხდომის პარალელურად, მედიის წარმომადგენლებმა 5 ივლისს მომხდარი მოვლენების გამო პროტესტი კიდევ ერთხელ გამოხატეს. მათ ხელში ეკავათ 5-6 ივლისს დაზარალებული ჟურნალისტებისა და ოპერატორების ფოტოსურათები, მათ შორის - გარდაცვლილი ოპერატორის, ლექსო ლაშქარავას ფოტოც.
„ტვ პირველის“ ჟურნალისტის, დიანა ტრაპაიძის განცხადებით, თითოეულმა დამნაშავემ პასუხი უნდა აგოს.
„პირველი რიგის ამოცანა არის სამართლებრივი პასუხისმგებლობა ამ ძალადობის ორგანიზატორებზე. ჩვენ ვხედავთ, რომ 5 ივლისიდან ამდენი დღე გავიდა და მხოლოდ 25 ადამიანი არის დაკავებული - მათ შორის არცერთი ორგანიზატორი.
ჩვენ გვახსოვს თქვენი, ჟურნალისტების მონათხრობი, ვინც უშუალოდ დაზარალდით 5 ივლისს, როდესაც თითო ეპიზოდში მონაწილეობდა სულ მცირე 10-15 მოძალადე.
მაგალითად, „სირცხვილიას“ ოფისის დარბევის დროს, როდესაც სასტიკად დაზიანდა ჩვენი კოლეგა, ლექსო ლაშქარავა, ჩვენ ვნახეთ, რომ იმ ეპიზოდში 40-50 და უფრო მეტი ადამიანიც მონაწილეობდა", - განაცხადა ტრაპაიძემ.
მისი თქმით, პირველი რიგის ამოცანაა სამართლებრივი რეაგირება და კონკრეტული პირების მიერ პოლიტიკური პასუხისმგებლობის აღება.