პარლამენტის ვიცე-სპიკერმა არჩილ თალაკვაძემ საქართველოში აშშ-ს ყოფილ ელჩს, ჯონ ბასს სახელმწიფო მდივნის მოადგილის თანამდებობაზე წარდგენა მიულოცა. ამის შესახებ არჩილ თალაკვაძე სოციალურ ქსელში წერს.
„წარმატებებს ვუსურვებ ჯონ ბასს, რომელიც აშშ-ის პრეზიდენტმა ჯო ბაიდენმა სახელმწიფო მდივნის მოადგილის თანამდებობაზე წარადგინა.
ჯონ ბასი ღირსეული პროფესიონალია და მოხარული ვარ, რომ მასთან წარმატებული სამუშაო გამოცდილება გვაკავშირებს. მისი დიპლომატია და ლიდერობა გამორჩეული იყო საქართველოსთვის ძალიან მნიშვნელოვან პერიოდში.
როგორც არაერთ ჩვენს ამერიკელ მეგობარს, ჯონს და მის მეუღლეს - ჰოლის უყვართ საქართველო, პატივს სცემენ ჩვენს კულტურას და ტრადიციებს და დიდად აფასებენ ქართველი და ამერიკელი ხალხის მეგობრობას“,- წერს თალაკვაძე.
ცნობისთვის, ჯონ ბასი 2009-2012 წლებში საქართველოში აშშ-ის ელჩის თანამდებობას იკავებდა.