ჯანდაცვის მინისტრის განცხადებით, თუ პირბადის ტარებისთვის გარკვეული სანქციები გახდება საჭირო, უწყებათაშორისი საკოორდინაციო საბჭო აღნიშნულ საკითხზე იმსჯელებს

ჯანდაცვის მინისტრის ეკატერინე ტიკარაძის განცხადებით, თუ პირბადის ტარებისთვის გარკვეული სანქციები გახდება საჭირო, უწყებათაშორისი საკოორდინაციო საბჭო აღნიშნულ საკითხზე იმსჯელებს.

როგორც მინისტრი აცხადებს, ამ ეტაპზე პირბადის ტარების რეკომენდაციაც საკმარისია, რომ მოქალაქეებმა საკუთარი ქცევა მართონ.

„მე კარგად მახსენდება პანდემიის პირველი ტალღა, როდესაც მარტივი რეკომენდაციები გაიცა. მაშინ არაერთხელ აღვნიშნავდი, რომ იყო საოცარი ერთსულოვნება და ერთად ვახორციელებდით იმ ღონისძიებებს, რომელიც პანდემიის დასაძლევად იყო საჭირო. აქედან გამომდინარე, ვთვლი, რომ დღესდღეობით, როცა სამედიცინო სექტორს, სამთავრობო გუნდს, თითოეულ ჩვენგანს აქვს საკმარისი გამოცდილება და ცოდნა იმასთან დაკავშირებით თუ რა არის ყველაზე ეფექტური გზა, რომ ვიყოთ დაცულები და და ასევე დავიცვათ სხვა. სავალდებულოობა რა თქმა უნდა, შეიძლება იქნეს განხილული პირბადის ტარების ამა თუ იმ სივრცეში, მაგრამ ვთვლი, რომ როცა არსებობს რეკომენდაცია, ისიც გახლავთ საკმარისი, რათა ვმართოთ ჩვენი ქცევა. თუმცა, თუ ჩვენ დავინახავათ, რომ საჭიროა გარკვეული სანქციების დაწესება, რათა გავზარდოთ პირბადის ტარება, ამას გავიტანთ საბჭოზე სამსჯელოდ და შესაბამისად მივიღებთ გადაწყვეტილებას“, - განაცხადა ტიკარაძემ.