3 ოქტომბერს მადრიდში ჩატარდება ლათინო-ამერიკის კინოდაჯილდოების ცერემონია Platino Awards-ი, რომელიც ყოველწლიურად ათეულობით აღიარებულ კინემატოგრაფისტს აჯილდოებს სხვადასხვა ნომინაციაში. კინოდაჯილოების პარალელურად, იმართება ინდუსტრიული ღონისძიება Platino Industria forum. ამის შესახებ ინფორმაციას „ეროვნული კინოცენტრი“ ავრცელებს.
ეროვნულმა კინოცენტრმა ფორუმზე დასასწრებად ქართველი პროდიუსერების განაცხადების მიღება უკვე დაიწყო.
„ეროვნული კინოცენტრისა და ესპანური ორგანიზაცია „ეხედას" თანამშრომლობით, კინოინდუსტრიის წარმომადგენლებს შესაძლებლობა ექნებათ სამომავლო თანამშრომლობის მიზნით გაუზიარონ ერთმანეთს პროექტები, დაესწრონ B2B შეხვედრებსა და დაამყარონ ახალი კონტაქტები. მადრიდის შემდეგ, ესპანელი და ქართველი პროდიუსერების თანამშრომლობა თბილისში გაგრძელდება.
ღონისძიება მადრიდსა და თბილისში ხორციელდება ევროკავშირის პროგრამა EU4Business: Connecting Companies-ის მხარდაჭერით. პროგრამის მიზანია ევროკავშირის წევრ და აღმოსავლეთ პარტნიორობის ქვეყნებს შორის ეკონომიკური კავშირების განვითარება“, - ნათქვამია ინფორმაციაში.