თქვენი პოლიტიკური პარტიის მხრიდან ზიზღის კამპანიაზე საუბარი უბრალოდ ამორალურია - თქვენს პოლიტიკურ ძალას უფლება არა აქვს ზიზღის დასრულებისკენ ჩვენ მოგვიწოდოს, - ამ განცხადებით ფრაქცია „ქართული ოცნების“ თავმჯდომარემ მამუკა მდინარაძემ ოპოზიციონერ კოლეგას ხატია დეკანოიძეს პარლამენტის ბიუროს სხდომაზე მიმართა.
როგორც მდინარაძემ აღნიშნა, „ბათუმში ვიღაცამ რაღაცას ფეხი რომ წამოკრას და დაეცეს, არჩევნებამდე კახა კალაძეს დაბრალდება“.
„თქვენ ვერ ამჩნევთ თქვენი ტელევიზიის დირექტორისგან პირდაპირ ეთერში დედის გინებას, მაგრამ ამჩნევთ ვიღაცის მიერ გაკრულ პლაკატს, რომელიც ერთ დღეში იდენტიფიცირებულია. რაკი ასე გაწყობთ, ეს თქვენი ნეგატიური პიარი კალაძისკენ უნდა მიემართოს. რა თქმა უნდა, ზიზღი და ძალადობის კამპანია ცუდი და დასაგმობია, მაგრამ საქმის გარკვევა თქვენგან ასე უნდა იყოს, რომ ვიღაც ბნელმა რაღაც ჩაიდინა და პირდაპირ იტყვით, რომ ეს გააკეთეთ თქვენ! არსებულ მოცემულობას ტყუილებს თუ გამოვაკლებთ, არაფერი არ რჩება - რჩება ფარსი, რასაც წლებია საზოგადოებას სთავაზობთ“, - მიმართა დეკანოიძეს მამუკა მდინარაძემ.