ბათუმის ახალი მეჩეთის საკითხი ერთ-ერთი ღია, თვალსაჩინო მაგალითია, რომლის საფუძველზეც შეგვიძლია ვთქვათ, როგორია უმცირესობების მდგომარეობა საქართველოში, - ამის შესახებ ფრაქცია „შარლ მიშელის რეფორმების ჯგუფის" წევრმა ტარიელ ნაკაიძემ განაცხადა.

როგორც ნაკაიძე განმარტავს, არსებული კანონმდებლობა საკმაოდ ლიბერალურია, თუმცა პრაქტიკაში ძალიან ბევრი ხარვეზი ვლინდება. მისივე თქმით, ხელისუფლებას უმცირესობების მიმართ სწორი დამოკიდებულება და პოლიტიკა არა აქვს, რაც ბათუმის ახალი მეჩეთის მშენებლობის ნაწილშიც გამოჩნდა.

„ქვეყნის იმიჯისთვის არ არის კარგი, როცა უმცირესობების მიმართ დისკრიმინაციული მიდგომა დადგინდა. სამწუხაროა, რომ ბათუმის მერმა თითქოს მუსლიმებს ბაირამის დღესასწაული მიულოცა, მაგრამ იმავე დღეს ბათუმის ახალ მეჩეთზე სასამართლოს გადაწყვეტილება მესამე ინსტანციაში გაასაჩივრა. ბათუმის ახალი მეჩეთის საკითხი ერთ-ერთი ღია, თვალსაჩინო მაგალითია, რომლის საფუძველზეც შეგვიძლია ვთქვათ, როგორია უმცირესობების მდგომარეობა საქართველოში. პრაქტიკული თვალსაზრისით გვაქვს უკანსვლა და არა წინსვლა, თუმცა საკანონმდებლო ბაზა ლიბერალურია, რომელსაც სწორი აღქმა სჭირდება", - განაცხადა ტარიელ ნაკაიძემ.