რესპუბლიკური საავადმყოფოს ეზოში ორი კარავი განთავსდა, სადაც სავარაუდოდ, მოქალაქეები აცრის შემდეგ დაყოვნებას შეძლებენ. ჯერჯერობით, სივრცე მოქალაქეებისთვის გახსნილი არ არის.
რესპუბლიკური საავადმყოფოს დირექტორის მოადგილის ჯავარ უგრეხელიძის განცხადებით, კლინიკაში ვაქცინაციის პროცესი მნიშვნელოვნად გააქტიურდა.
"ვაქცინაციის პროცესი მნიშვნელოვნად არის გააქტიურებული, რაც ძალიან პოზიტიურია და ძალიან მალე დაგეგმილ ნიშნულს მივაღწევთ. გუშინ აცრილების დღიური მაჩვენებელი იყო 2500-ზე მეტი. 15 კაბინეტი 12 სთ-იან რეჟიმში მუშაობს. "ფაიზერზე" კვლავ განსაკუთრებით დიდი მოთხოვნაა. დამატებითი ჯავშნებიც დაემატა გუშინ საღამოს და მოქალაქეები თავისუფლად ახერხებენ დაჯავშნას. ვფიქრობ,ეს პროცესი პოზიტიურად მიდის და მალე მივაღწევთ იმ ნიშნულს, რომელიც აუცილებელია პანდემიიდან გამოსასვლელად",-განაცხადა უგრეხელიძემ.
შეგახსენებთ, საქართველოში კორონავირუსის 2796 ახალი შემთხვევა დადასტურდა, ხოლო ვირუსის შედეგად 17 ადამიანი გარდაიცვალა.