საარჩევნო მიზნებისთვის სწორი არ არის სააკაშვილის ჩამოსვლა არჩევნების წინ - ეს არის სტრატეგიული შეცდომა, რითაც „ქართული ოცნება" სარგებლობს,- ამის შესახებ „სტრატეგია აღმაშენებლის“ დეპუტატმა პაატა მანჯგალაძემ ჟუენალისტებთან განაცხადა. თუმცა, როგორც მანჯგალაძე აღნიშნავს, სააკაშვილს საქართველოში ჩამოსვლის უფლება აქვს და ვერავინ განუსაზღვრავს, როდის ჩამოვიდეს.
„ყოფილ პრეზიდენტს აქვს საქართველოში ჩამოსვლის უფლება. როდის ჩამოვა, ეს მისი გადასაწყვეტია, შეუძლია, ნებისმიერ დროს ჩამოვიდეს. ვფიქრობ, რომ საარჩევნო მიზნებისთვის სწორი არ არის მისი არჩევნების წინ ჩამოსვლა. ჩვენ არ უნდა ჩავატაროთ რეფერენდუმი იმის თაობაზე, სააკაშვილის ჩამოსვლა ვის უნდა, რეფერენდუმი უნდა ჩავატაროთ, „ქართული ოცნების“ შეცვლაზე. ეს არის სტრატეგიული შეცდომა არჩევნების წინ, რითაც „ქართული ოცნება" სარგებლობს, მაგრამ ჩვენ ვერავის დავუშლით ჩამოსვლას. საარჩევნოდ ასეთი ჰიპოთეტური საფრთხეებით სარგებლობს „ქართული ოცნება" 9 წლის განმავლობაში და მათ ამ ნარატივის შექმნაში სააკაშვილის განცხადება ეხმარება“, - განაცხადა მანჯგალაძემ.