ირაკლი ღარიბაშვილი - ჩვენ მაქსიმალურ ყურადღებას დავუთმობთ პოლიციელების სოციალურ გარანტიებს, მათზე და მათ ოჯახებზე ზრუნვას
მინისტრს აქვს მკაფიოდ ჩამოყალიბებული ხედვა, გეგმა, თუ როგორ განავითაროს მისდამი დაქვემდებარებული უწყება - ჩვენ მაქსიმალურ ყურადღებას დავუთმობთ პოლიციელების სოციალურ გარანტიებს, მათზე და მათ ოჯახებზე ზრუნვას, - ამის შესახებ საქართველოს პრემიერ-მინისტრმა ირაკლი ღარიბაშვილმა შინაგან საქმეთა სამინისტროს 10-წლიანი განვითარების გეგმის პრეზენტაციაზე სიტყვით გამოსვლისას განაცხადა.
პრემიერის თქმით, ძალიან ბევრი პროექტია დაგეგმილი, რომელიც ინფრასტრუქტურის განვითარებას, აღჭურვილობის, შეიარაღების განახლებას და პოლიციელებისთვის შესაბამისი სოციალური გარანტიების შექმნას შეეხება.
„მთავრობა ყველაფერს გააკეთებს პროექტების მხარდასაჭერად. ბიუჯეტიდან გამოიყოფა დამატებითი სახსრები, იმისთვის, რომ ყველა პროექტი, პროგრამა იყოს დაფინანსებული. კიდევ ერთხელ, მე მადლობას გიხდით, როგორც რიგითი მოქალაქე, როგორც, ამ შემთხვევაში, მთავრობის მეთაური და ყოფილი შინაგან საქმეთა მინისტრი. ჩემთვის ძალიან დიდი პატივია თქვენს წინაშე გამოსვლა და მე მინდა, კიდევ ერთხელ, მადლობა გადაგიხადოთ თქვენი გმირობისთვის“, - აღნიშნა ირაკლი ღარიბაშვილმა.
