კონსტიტუციურ კანონში დაგეგმილი ცვლილებების პროექტის საყოველთაო-სახალხო განხილვა დეპუტატებს შალვა პაპუაშვილსა და დავით უსუფაშვილს შორის კამათით დასრულდა. კამათი პაპუაშვილის რეპლიკას მოჰყვა, რომელმაც უსუფაშვილს მიმართა, რომ როცა თანხმობის მნიშვნელობაზე საუბრობს, გაიხსენოს, რომ საარჩევნო რეფორმა თანხმობის დოკუმენტი იყო, მაგრამ პირადად მან და ფრაქცია "ლელომ" აღნიშნულ ცვლილებებს ხმა არ მისცა.

"თუკი თანხმობა თქვენი სურვილია, სად არის თანხმობის დასტური?! როცა საარჩევნო ცვლილებებს ვიღებდით, ტაბლოზე "ლელოს" ხმები არ იყო", - განაცხადა შალვა პაპუაშვილმა.

თავის მხრივ, უსუფაშვილმა პაპუაშვილს უპასუხა, რომ საქმე იმაზე ცუდად ყოფილა, ვიდრე ეგონა. მან აღნიშნა ისიც, რომ სწორედ ამდაგვარმა თითის გაშვერამ დააქცია ქვეყანა წლების განმავლობაში.

"თუკი თქვენ ჩემი საუბრიდან ეს დასკვნა გამოიტანეთ, საქმე იმაზე ცუდად ყოფილა, ვიდრე მეგონა", - განაცხადა დავით უსუფაშვილმა შალვა პაპუაშვილის მისამართით.