14 აგვისტოდან ნაწილობრივ შეზღუდვები შემოვიდა, რომელიც მაინც არ სრულდება. სახელმწიფო მაინც იჩენს სირბილეს მოსახლეობას მიმართ და არ მიმართავს აღსრულების ძალიან მკაცრ ზომებს, - ამის შესახებ თბილისის ინფექციური საავადმყოფოს გენერალურმა დირექტორმა თენგიზ ცერცვაძემ ჟურნალისტებს განუცხადა.
როგორც ცერცვაძემ აღნიშნა, ქვეყნის მთავარი ამოცანაა, კორონავირუსით ინფიცირებულთა რაოდენობა არ გაიზარდოს, ხოლო ჯანდაცვის სექტორის ვალდებულება, ყველა პაციენტისთვის სათანადო სამედიცინო მომსახურების გაწევა.
„14 აგვისტოდან ნაწილობრივ შეზღუდვები შემოვიდა, რომელიც მაინც არ სრულდება, - მაინც ეწყობა ხალხმრავალი ქორწილები, შეხვედრები, იუბილეები და სხვა, რაც არის ერთ-ერთი ძირითადი მიზეზი ამ შემთხვევების მატებისა. პირბადის ტარების მაჩვენებელი გაიზრდა, მაგრამ რეგიონები ისევ ვერანაირ კრიტიკას ვერ უძლებს. ჯერჯერობით აღსრულებაც არ არის, სახელმწიფო მაინც იჩენს სირბილეს მოსახლეობას მიმართ და არ მიმართავს აღსრულების ძალიან მკაცრ ზომებს. ქვეყნის ამოცანაა, რომ იყოს ცოტა ავადმყოფი. ჯანდაცვის სექტორის ამოცანაა, რაც არ უნდა ბევრი ავადმყოფი იყოს, უზრუნველყოს უკლებლივ ყველას სამედიცინო მომსახურება, ჩავარდნების გარეშე და ამას შეიძლება დასჭირდეს საველე ჰოსპიტლები“, - განაცხადა თენგიზ ცერცვაძემ.