ჩვენი მხრიდან ყურადღება გამახვილდება წინასაარჩევნო გარემოზე და იმ პირობებზე, რომელშიც წინასაარჩევნო კამპანიის ჩატარება გვიწევს, - ამის შესახებ პარტია „საქართველოსთვის“ ერთ-ერთმა ლიდერმა ნათია მეზვრიშვილმა „მიშელის კაბინეტთან“ შეხვედრის დაწყებამდე განაცხადა.
მეზვრიშვილის განცხადებით, საერთაშორისო პარტნიორების მხარდაჭერა მაშინ, როდესაც მათი პარტიის წარმომადგენლებზე უპრეცედენტო სისტემური ზეწოლა მიმდინარეობს ძალიან მნიშვნელოვანი იქნება.
,,ყურადღებას გავამახვილებთ პოლიტიკური ნიშნით დევნის შემთხვევებზე და ხაზი გაესმევა საერთაშორისო დამკვირვებლების დასწრების მნიშვნელობას არჩევნებზე. ჩვენ ვფიქრობთ, რომ ეს არის ერთ-ერთი ყველაზე მნიშვნელოვანი არჩევნები ქვეყნის დემოკრატიული განვითარებისთვის. საერთაშორისო პარტნიორების მხარდაჭერა მაშინ, როდესაც უპრეცედენტო სისტემური ზეწოლა მიმდინარეობს ჩვენი პარტიის წარმომადგენლებზე იქნება ძალიან მნიშვნელოვანი“, - აღნიშნა ნათია მეზვრიშვილმა.
ცნობისთვის, საქართველოში ევროკავშირის ოფისში ოპოზიციური პარტიების წარმომადგენლებთან შეხვედრა მიმდინარეობს. შეხვედრას „სტრატეგია აღმაშენებლის“ ლიდერი გიორგი ვაშაძე, ფრაქცია „შარლ მიშელის რეფორმების ჯგუფის“ თავმჯდომარე ხათუნა სამნიძე, პარტია „საქართველოსთვის“ წევრი ნათია მეზვრიშვილი, ფრაქცია „ლელოს“ წევრი სალომე სამადაშვილი და „გირჩის“ წარმომადგენელი ვახტანგ მეგრელიშვილი ესწრებიან.
ასევე, აუდიენციაში ონლაინ რეჟიმში, გერმანიიდან მონაწილეობენ „ლელოს“ ერთ-ერთი ლიდერი ბადრი ჯაფარიძე და „ნაციონალური მოძრაობის“ წევრი თინა ბოკუჩავა. შეხვედრაზე მასპინძლების მხრიდან, ევროკომისიის მიგრაციისა და საშინაო საქმეთა (DG-HOME) გენერალური დირექტორის მოადგილე საიმონ მორდიუსია წარმოდგენილი.