„ქართული ოცნების“ ოზურგეთის მერობის კანდიდატმა, ავთანდილ თალაკვაძემ, წინასაარჩევნო კამპანიის ფარგლებში, ახალგაზრდებს სპორტისა და ახალგაზრდობის სფეროში პროგრამა წარუდგინა და სამომავლო გეგმები გააცნო. ამის შესახებ ინფორმაციას „ქართული ოცნების” პრესსამსახური ავრცელებს.
თალაკვაძის განცხადებით, ახალი თაობა ადგილობრივი მმართველობის პროცესში უფრო მეტად იქნება ჩართული.
„ახალგაზრდებს წარვუდგინე ჩვენი პროგრამა სპორტისა და ახალგაზრდობის სფეროში. სპორტი გახდება ხელმისაწვდომი კიდევ უფრო მეტი ადამიანისთვის, ვგეგმავთ სპორტული მოედნების და კლუბების რეაბილიტაციას, მწვრთნელებს ექნებათ მეტი მხარდაჭერა მუნიციპალიტეტის მხრიდან, მოეწყობა ახალი სარეკრეაციო სივრცეები, მოხდება ცხოვრების ჯანსაღი წესის პოპულარიზაცია,
ახალგაზრდებს დავეხმარებით ინოვაციური სტარტაპ პროექტების განხორციელებაში. ახალი თაობა უფრო მეტად იქნება ჩართული ადგილობრივი მმართველობის პროცესში“, - განაცხადა ავთანდილ თალაკვაძემ.
ამასთან, შეხვედრას პარლამენტის თავმჯდომარის მოადგილე არჩილ თალაკვაძე, გურიის მაჟორიტარი დეპუტატი ვასილ ჩიგოგიძე და „ქართული ოცნების“ ოზურგეთის რაიონული ორგანიზაციის წარმომადგენლები ესწრებოდნენ.