გასაგები მოწოდება იყო როგორც ხელისუფლების ისე ოპოზიციის მიმართ, რომ ვისაც ხელი აქვს მოსაწერი მიშელის შეთანხმებაზე, მოაწეროს, ვისაც შესასრულებელი აქვს, შეასრულოს,- ამის შესახებ "გირჩის" დეპუტატმა იაგო ხვიჩიამ ჟურნალისტებთან განაცხადა.

როგორც მან აღნიშნა, მაკროფინანსური დახმარების მიღებას საფრთხე ემუქრება.

"სამწუხაროდ, მაკროფინანსური დახმარების შეწყვეტის რეალური შანსი არსებობს, თუ საქართველოს ხელისუფლება გონს არ მოეგება. მე ვიცი, რომ მაკროფინანსურ დახმარების მიღებასა და 19 აპრილის შეთანხმებას შორის კავშირი არსებობს, რამდენად განმსაზღვრელი იქნება ეს კავშირი და სხვა გარემოებები არ მოახდენენ გავლენას, მე არ ვიცი, მაგრამ მე როგორც მაქვს ინფორმაცია, ძალიან გასაგები მოწოდება იყო როგორც ხელისუფლების, ისე ოპოზიციის მიმართ, რომ დოკუმენტს პატივი სცენ, ვისაც ხელი აქვს მოსაწერი მოაწერონ, ვისაც შესასრულებელი აქვს, შეასრულოს,"- განაცხადა იაგო ხვიჩიამ.

ცნობისათვის, ევროკავშირის წარმომადგენლობაში გამართული შეხვედრის შემდეგ, ოპოზიციის წარმომადგენლებმა განაცხადეს, რომ შეხვედრაზე მაკროფინანსური დახმარების საკითხზე იყო საუბარი. მათი თქმით, თუ 19 აპრილის შეთანხმებით გათვალისწინებული ვალდებულებები არ შესრულდება, საქართველო დახმარებას ვერ მიიღებს.