სასწავლო პროცესი 4 ოქტომბრამდე, მედიცინის პროგრამის სტუდენტების გარდა, უნივერსიტეტებშიც დისტანციურ რეჟიმში დაიწყება

განათლებისა და მეცნიერების მინისტრის, მიხეილ ჩხენკელის განცხადებით, ყველა უნივერსიტეტი სასწავლო პროცესს 4 ოქტომბრამდე დისტანციურ რეჟიმში იწყებს, ერთადერთი გამონაკლისია მედიცინის პროგრამის სტუდენტებისთვის პრაქტიკული, ლაბორატორიული და კლინიკური მეცადინეობები.

„ყველა უნივერსიტეტს სწავლის დაწყების თავისი თარიღი გააჩნია და თავისი აკადემიური გრაფიკით აწარმოებს სასწავლო პროცესს - ყველა იწყებს, როდესაც მათ აქვთ ეს გაცხადებული, ოღონდ 4 ოქტომბრამდე იწყებენ დისტანციურ ფორმატში და 4 ოქტომბერს ვნახავთ სიტუაციას. ჩვენ დეტალურად გამოვიკვლევთ იმ დროისთვის, რა არის ინფიცირების მაჩვენებელი კონკრეტულ ქალაქსა და სოფელში და ამაზე იქნება დამოკიდებული გადაწყვეტილების მიღება.

უნივერსიტეტებში ერთადერთი გამონაკლისი ეს გახლავთ მედიცინის პროგრამის სტუდენტებისთვის პრაქტიკული, ლაბორატორიული და კლინიკური მეცადინეობები. მინდა აღვნიშნო, რომ თეორიული მედიცინისთვისაც სწავლა მთლიანად იქნება დისტანციურად 4 ოქტომბრამდე. რაც შეეხება მანამდე, უფლებამოსილება ეძლევათ უნივერსიტეტებს, რომ მედიცინის პროგრამის სტუდენტებისთვის კლინიკური, ლაბორატორიული და პრაქტიკული სამუშაოები აწარმოონ დასწრებული ფორმატით, ოღონდ აქაც არის ძალიან მნიშვნელოვანი დათქმა, რომ ამ აქტივობების დროს, როგორც სტუდენტები, ასევე პროფესორ-მასწავლებლები, რომლებიც უძღვებიან ამ პროცესს, უნდა იყვნენ ორჯერადად აცრილები, ესეც მნიშვნელოვანი კრიტერიუმია. ყველა ეს დეტალი გამოქვეყნდება, როგორც ჩვენს ვებ-გვერდზე, ისე „ფეისბუქზე“ და შესაბამისი, კონკრეტული მითითებები უკვე დაურიგდებათ სკოლებს, პროფესიულ კოლეჯებს და უნივერსიტეტებს“, - აცხადებს ჩხენკელი.

ალექსეი მალაშენკო - არავინ იცის როგორ უნდა დასრულდეს რუსეთ-უკრაინის ომი, მათ შორის არც პუტინმა
ქართული პრესის მიმოხილვა 28.11.2022
ლევან შენგელია - მხოლოდ რუსეთის ფუნდამენტურმა დამარცხებამ უკრაინასთან და მთლიანად დასავლეთთან დაპირისპირებაში შეიძლება აგვაცილოს თავიდან ცუდი მომავალი
PSP განცხადებას ავრცელებს